Bıatlon: Galına Vıshnevskaıa álem kýbogy kezeńinde 11-inshi oryndy ıelendi
ASTANA. QazAqparat - Germanııanyń Rýpoldıng qalasynda búgin márege jetken bıatlonnan álem kýbogynyń besinshi kezeńinde qazaqstandyq sportshy Galına Vıshnevskaıa 10 shaqyrymǵa izge túsip jarysýda 11-inshi oryndy ıelendi, dep habarlaıdy «QazAqparat» HAA tilshisi.
Eýrosport telearnasynan tikeleı efırde kórsetkenindeı, jarys jolyna G.Vıshnevskaıa segizinshi bolyp shyqty. Óıtkeni osynyń aldyndaǵy sprınttik básekede Galına márege segizinshi bolyp jetken edi. Bul joly bıatlonshylar jarys barysynda eki ret jatyp, sonsha ret turyp nysana kózdeýden de básekege tústi. Eki ret múlt ketkenmen, ushqyrlyǵyn joǵalta qoımaǵan G.Vıshnevskaıa 11-inshi nátıjeni kórsetti. Bul da - jaqsy kórsetkish.
Atalmysh izge túsip jarysýda ataqty fın bıatlonshysy Kaısa Mıakıarıaınen ózgelerden qara úzip ketip, márege jeke dara keldi. Sóıtip bıyl álem kýbogy kezeńinde ekinshi ret qatarynan jeńiske jetti. Ekinshi bolyp kelgen chehııalyq Gabrıela Koýkalova álem kýbogyndaǵy jalpy kóshbasshylyq ornyn saqtap qaldy. Taǵy bir tájirıbeli sportshy, frantsııalyq Marı Doren-Aber qola júldeger atandy.
Aıta keteıik, 2016-2017 jylǵy álem kýbogy kezeńderinde tym-táýir nátıjelerge qol jetkizip júrgen G.Vıshnevskaıa jalpy esepte 282 upaımen 13-orynǵa kóterildi.
© VKsport.kz
