BI Group, BAZIS-A kompanııalary kirisin tómendetip kórsetken – Qarjy mınıstrligi

ASTANA. KAZINFORM – Elimizde iri qurylys kompanııalary kirisin tómendetip kórsetip, salyqtan jaltarǵan. Bul týraly Qarjy mınıstrligi habarlaıdy.

- Memlekettik kiris organdary BAZIS-A kompanııasyna salyq salynatyn kiristerdiń 4,6 mlrd teńge somasyna, sondaı-aq BI Group kompanııasyna 11,9 mlrd teńgege tómendetip kórsetkeni týraly habarlama joldady. Atalǵan jumys arnaýly salyq rejımderin (ASR) qoldanatyn sýbektilerdiń ózara esep aıyrysýyn taldaý sheńberinde 2022 - 2023 jyldary jalpyǵa birdeı belgilengen tártippen jumys istegen kompanııalarǵa baılanysty júrgizilip otyr, - delingen habarlamada.

Aqparatta aıtylǵandaı, atalǵan kompanııalar arnaýly salyq rejımin tólemdi azaıtý úshin paıdalanǵan.

- Osy oraıda kameraldy baqylaý rásimi salyq tóleýshilerge tekseristen buryn tabysty derbes túrde rettep, salyq tóleýge múmkindik beredi, - dep habarlaıdy Kirister komıtetinen.

Aıta ketsek, kúni keshe Úkimet basshysy Oljas Bektenov kásipkerlerdi eki aptada salyq somasyn ádiletti túrde tóleýge shaqyrǵan edi. 

– Qarjy mınıstriniń aqparatynan salyq júktemesin ońtaılandyrýdyń ártúrli shemalaryn qoldana otyryp, josyqsyz kásipkerlerdiń ózin durys ustamaıtyny kórinedi. Mıllıardtaǵan aınalymmen olar bıýdjetke ózderiniń tapqan paıdasyna múldem sáıkes kelmeıtin somalardy tóleıdi. Bizde osyndaı iri kompanııalardyń tolyq tizimi bar. Ol tizimde BI Group, BAZIS jáne basqa da kóptegen iri qurylys kompanııasy júr. Ekonomıkanyń basqa salalarynda jumys isteıtin belgili ári tanymal meıramhanalar, fıtnes-klýbtar jáne ártúrli kompanııalar bar, - dedi Premer-mınıstr.