Bı-bı-sı tilshisi reportaj ústinde «sıqyr» kórsetti
ASTANA. QazAqparat - BBC North America jýrnalısi Djon Sopel Aq úıde jasaǵan reportajy barysynda kórermenderdi tańǵaldyrdy, dep habarlaıdy Daily Mirror.
Sopel qolyn ary-beri siltep salyp sóılep jatqan sátte qolynda kenetten qolǵap paıda bola ketedi. Áleýmettik jeli qoldanýshylary bul oqıǵany qaljyńdap «sıqyrly trıýk» dep atady.
«Djon Sopel bos ýaqytynda sıqyrshy bolyp aqsha taýyp júr me?», - dep suraq qoıdy Rassel Djoıs.
«Sopeldiń osyndaı jaǵdaıǵa arnalǵan qol dýbleri bolǵany ma?», - dep jazdy Nıl Baýness.
«Ózdiginen kúnge kúıýdiń qupııa ádisi me?», - dep ázildedi Ollı Glanvıll.
Sopel shyn máninde ne bolǵanyn keıin túsindirdi. Onyń aıtýynsha, sensorly telefonyn saýsaq izi arqyly buǵattan shyǵarý maqsatynda qolǵabyn sheship, keıin qaıtyp kıgen kórinedi.
«Maǵan Tramptyń bir sózi shuǵyl qajet boldy, keıin telefonymnyń buǵattalyp qalǵanyn baıqadym. Sondyqtan, ony buǵattan shyǵarý úshin qolǵabymdy jyldam sheshtim», - dep túsindirdi jýrnalıst, adamdardyń ony sıqyrshy dep esepteıtinine qýanyshty ekendigin qosyp.
