Bı-Bı-Sı basshysy jumysynan ketedi
ASTANA. 11 qarasha. QazAqparat - Bı-Bı-Sı-diń Bas dırektory Djordj Entýısl Brıtanııada Newsnight baǵdarlamasynyń kezekti sany efırge shyqqannan keıin óristegen janjaldyń sebebinen jumysynan ketýge ótinish berdi, dep habarlady Bı-Bı-Sı.
Onda jýrnalıster qatelesip, burynǵy konservatıvtik saıasatker lord Makellaınnyń pedofılge qatysy bar dep aıyptady. Baǵdarlamada lord Makellaınnyń esimi atalǵan joq.
Djordj Entýısl lord Alıster Makellaınnan keshirim surady jáne habardy efırge shyǵar aldynda kórmegenin túsindirdi.
«Bas dırektor sonymen qatar bas redaktordyń mindetin de atqaratyn jáne saıyp kelgende barlyq baǵdarlamanynyń mazmuny úshin jaýap beretin bolǵandyqtan, 2 qarashada, juma kúni kórsetilgen Newsnight baǵdarlamasy jýrnalıstik standartqa jatpaıtynyn eskere otyryp, men óz qyzmetimnen ketýdi ardyń isi dep sanadym», - delingen Entýısldyń málimdemesinde.
Onyń aıtýynsha, Newsnight jýrnalısteri «kásibıligi tómen» ekendigine mysal bolatyn eleýli qatelik jiberdi.
Sonymen qatar Djordj Entýısl Bı-Bı-Sı-de kóptegen talantty jáne adal adamdar jumys isteıtetinin atap kórsetti.
«Sondyqtan da ol álemdegi tańdaýly habar taratý korporatsııasy bolyp qala beredi», - dep qosty ol.
Djordj Entýısl korporatsııa basshysy bolyp eki aıǵa jetpeıtin ýaqyt qana jumys istedi.
Korporatsııanyń basshysy mindetin ýaqytsha BBC Worldwide dırektory Tım Deıvı atqaratyny jarııalandy.
Entýısl málimdeme jasaǵan kezde qasynda turǵan Bı-Bı-Sıdiń Qamqorshylar keńesiniń tóraǵasy lord Patten ol laıyqty qadam jasaǵanyn atap ótti.
Newsnight baǵdarlamasynda 1970-1980 jyldary jynystyq zombylyqqa ushyraǵan Ýels balalar úıiniń burynǵy tárbıelenýshisi jóninde áńgime qozǵalǵan bolatyn.
Bul týraly balalar úıiniń burynǵy tárbıelenýshisi áńgimeledi, ol zombylyq jasaýshylardyń arasynda Konservatıvtik partııanyń joǵary shendi saıasatkeri de bolǵanyn tilge tıek etti.
Brıtandyq Qaýymdar palatasynyń depýtattary bul oqıǵaǵa baılanysty Bı-Bı-Sı qoǵam tarapynan senimdi joǵaltyp almaýy úshin faktilerdi tekserýde saq bolýy qajettigin málim etti.
