BǴM jaýapty xatshysy bilimniń adam kirisine qalaı áser etetinin aıtyp berdi
ASTANA. QazAqparat - QR Bilim jáne ǵylym mınıstrliginiń jaýapty xatshysy Aryn Orsarıev Nazarbaev Ýnıversıtetinde ótken "Ómir boıy bilim: turaqty damý úshin úzdiksiz bilim alý" atty xalyqaralyq forým aıasynda mektep, kolledj jáne ýnıversıtet túlekteriniń jalaqy aıyrmashylyqtary týraly aıtyp berdi, dep xabarlaıdy QazAqparat.
"Eger azamat orta mektepti bitirse, naryq ony 30-35 myń teńge jalaqymen baǵalaıdy. Kolledj bitirgen bolsa, onyń ortasha jalaqysy 60 myń bolady. Joǵary oqý támamdaǵan túlekke ortasha alǵanda 80-85 myń teńge jalaqy beriledi eken. Men bilim alǵan alǵashqy jyldardy aıtyp otyrmyn. Qazaqstan boıynsha ortasha jalaqy 140 myń teńge ekenin eskersek, ústinen qosylǵan soma ómir boıy bilim alýdyń arqasynda qol jetkizildi", -dedi ol.
A. Orsarıevtiń sózine qaraǵanda, búgingi zamanda bilim salasyna salynǵan ınvestıtsııalar adam kapıtalyn damytýǵa salynǵan ınvestıtsııa bolyp esepteledi. Onyń pikirinshe, Qazaqstanda úzdiksiz bilim shamamen 18-19 jylǵa sozylady.
"Bul kórsetkish orta bilimmen qamtý deńgeıi 100% bolǵandyqtan jetkizilip otyr. Bıyldan bastap tegin kásibı-texnıkalyq bilim berýdi engizemiz. Qazaqstan boıynsha 9410 balabaqsha bar. Olar 807 myńǵa tarta balany qamtyp otyr. 2,9 oqýshyny qamtıtyn 7450 mektep, 489 myń azamatqa bilim beretin 817 kolledj bar. 512 677 adamdy qamtıtyn 130 joǵary oqý orny jumys isteıdi. Sonda 17 myń bilim mekemesi 4,5 mln azamatty jyl saıyn oqytady", - dep túıdi ol.
