BǴM suranys jaǵynan eń joǵary jáne eń tómen mamandyqtardy atady
QazAqparat agenttiginiń resmı saýalyna jaýap bergen Bilim jáne ǵylym mınıstrligi memlekettik bilim berý tapsyrysy, ıaǵnı granttar qandaı talaptarǵa baılanysty qalyptasatynyn habarlady. Naqtyraq aıtqanda granttar tizimi Eńbek jáne halyqty áleýmettik qorǵaý mınıstrligi usynǵan kadrlarǵa degen qajettilik boıynsha aqparat negizinde, sondaı-aq, «Atameken» ulttyq kásipkerler palatasynyń qysqamerzimdi boljamy, memlekettik organdardyń qajettiligi, bitirýshilerdiń jumysqa ornalasý kórsetkishteri, memlekettik baǵdarlamalardyń kórsetkishteri negizinde túziledi.
«Sońǵy jyldary pedagogıkalyq, aqparattyq tehnologııalar, shetel tili, quqyq salalary boıynsha bilim berý baǵdarlamalaryna suranys óte joǵary. Sonymen qatar, búgingi kúni kıberqaýipsizdik máselesiniń ózektiligine jáne ekonomıkany, áleýmettik salany, memlekettik basqarý júıesin tsıfrlandyrý jónindegi aýqymdy mindetterge baılanysty aqparattyq qaýipsizdik salasyndaǵy mamandar daıarlaýǵa suranystyń artqanyn baıqaýǵa bolady», - dep habarlaıdy Bilim jáne ǵylym mınıstrliginen.
Sonymen qatar mınıstrlik jyl saıyn konkýrstyń eń tómen kórsetkishteri aýyl sharýashylyǵy, metall óndirý, metallýrgııa mamandyqtaryna tıesili ekenin jetkizdi.
