BǴM respýblıka mektepterine oqýlyqtardy jetkizý júıesine ózgerister engizýdi usynady
ASTANA. QazAqparat - Bilim jáne ǵylym mınıstrligi mektepterge oqýlyqtardy jetkizýge qatysty ózgerister engizýdi usynady. Májiliste «Oqýshylardy oqýlyqtarmen jáne oqý-ádistemelik keshendermen qamtamasyz etý problemalary men sheshimderi» taqyrybynda ótken Úkimet saǵatynda Bilim jáne ǵylym mınıstri Aslan Sárinjipov osylaı málim etti.
«Oqýlyq tapshylyǵy boıynsha problemalardyń biri oqýlyqtardy jetkizý júıesine qatysty bolyp tabylady. Biz osyǵan qatysty arnaıy komıssııa quryp, ol boıynsha oqýlyq tizimin bekitý men olardy mektepke jetkizýge deıingi tizbekti qarap, tekserip shyqqan bolatynbyz. Onyń barysynda negizinen birqatar problemalar anyqtaldy, sonyń ishinde oqýlyqtardy jetkizý júıesi «aqaýǵa» ushyraǵany, oǵan birqatar ózgerister engizý qajettigi belgili boldy», deıdi A. Sárinjipov.
Onyń aıtýynsha, oqýlyqtardy satyp alýdy josparlaýda da birqatar olqylyqtar oryn alǵan. Sonyń ishinde jyl saıyn qarjylandyrýdyń jetispeýshiligi saldarynan oqýlyqty ýaqytyly satyp alýdyń durys josparlanbaıtyny da anyqtalǵan.
«Respýblıka boıynsha oqýlyqtarǵa qajetti suranystyń 3,6 paıyzy qarjylandyrylmaı jatyr. Máselen, jergilikti atqarýshy organdar tarapynan qajet etiletin oqýlyqtarǵa 686 mln 916 myń teńge kem qarajat bólingen», dedi A. Sárinjipov.
