BǴM muǵalimderdiń biliktiligin testileýde ashyqtyqty qamtamasyz etpek

NUR-SULTAN. QazAqparat – Bilim jáne ǵylym vıtse-mınıstri Sholpan Qarınova muǵalimderdiń ulttyq biliktilik testileýden ótýine qatysty jelide taraǵan ártúrli pikirge qatysty oıyn aıtty, dep habarlaıdy QazAqparat tilshisi.

Bilim jáne ǵylym vıtse-mınıstri Sholpan Qarınova Ulttyq biliktilik testileýdi ótkizý máseleleri boıynsha onlaın baspasóz máslıhatynda áleýmettik jelide tarap jatqan ártúrli áńgime alańdatyp otyrǵan másele ekenin jetkizdi.

«Ulttyq biliktilik testileýge qatysty zańbuzýshylyqtar bolmaýy tıis. Búgingi kúni muǵalimderdiń arasynda aqsha jınaý, ony tapsyrý sekildi suraqtardyń bary aıtylýda. Bul qanshalyqty shyndyq? Osyndaı másele bar ma? Árıne Bilim jáne ǵylym mınıstrligi neǵurlym osy testileýge qatysty ashyqtyqty qamtamasyz etý kerektigin ustanyp otyr. Árbir muǵalim osy testileýge barǵan kezde tolyǵymen obektıvtilikti qamtamasyz etýge baılanysty barlyq jaǵdaı jasalǵan. Sondyqtan eshbir zańbuzýshylyqqa barýǵa tıisti emespiz. Úzildi-kesildi ondaı jaǵdaıdy boldyrmaý kerek», - dedi Sholpan Qarınova.

Mınıstrlik osyndaı zańbuzýshylyqty boldyrmaý úshin barlyq sharany qarastyrmaq.

Aıta ketsek buǵan deıin Sholpan Qarınova bıyl ulttyq biliktilik testileýden 160 myń muǵalim ótetinin habarlaǵan bolatyn. Testileýden ótken muǵalimderdiń jalaqysy 1 qyrkúıekten bastap ósedi.