BǴM: Mektepterdi qarjylandyrý jáne satyp alý úrdisinde ashyqtyq qamtamasyz etilýi tıis
QR Bilim jáne ǵylym mınıstrliginiń málimetine saı, búgingi tańda jergilikti atqarýshy organdar elimizdegi mektepter men kolledjderge kompıýterlik tehnıka satyp alýda. Osyǵan baılanysty memlekettik qarajattyń ashyqtyǵy tolyq qamtamasyz etilip, uqypty jumsalýy qajet.
Búgingi tańda QR BǴM arnaıy resýrs daıyndap jatqanyn aıta ketken jón. Bul jerde jergilikti atqarýshy organdar men bilim berý uıymdarynyń ókilderi qazaqstandyq mektepter men kolledjderge tehnıkalyq jabdyqtardy satyp alý úrdisiniń ashyqtyǵyn qamtamasyz etý úshin aqparat ornalastyra alady. Sonymen qatar ár túrli deńgeıdegi bilim bıýdjeti týraly basqa da aqparatty kórýge bolady. Bul týraly búgin Bilim jáne ǵylym vıtse-mınıstri Rústem Bıǵarı Facebook-tegi paraqshasynda jazdy.
«Bıýdjettik qarjylandyrý jáne satyp alý máselelerine qatysty mınıstrliktiń ustanymy mynadaı: tolyq ashyqtyq qamtamasyz etilýi tıis jáne memlekettik qarajat uqypty jumsalýy qajet. Mektepter men kolledjder úshin qarjylandyrý men satyp alýdy ákimdikter nemese bilim berý uıymdary (mektepter, kolledjder) júzege asyrady. Muny bári bile bermeıdi. Qazirgi ýaqytta mektepterge kompıýterlerdi jergilikti atqarýshy organdar satyp alyp jatyr. Satyp alý protsedýrasy ashyq júrgizilýi tıis. Qajet bolǵan jaǵdaıda, materıaldar men fotosýretterdi Arnaıy monıtorıngtik top múshelerine berý qajet», – dep atap ótti QR Bilim jáne ǵylym vıtse-mınıstri Rústem Bıǵarı.
Sondaı-aq «Atameken» UKP, Tsıfrlyq damý, ınnovatsııalar jáne aeroǵarysh ónerkásibi mınıstrligi jáne QR Bilim jáne ǵylym mınıstrligimen jabdyqtarǵa, servıstik qyzmet kórsetýge, kepildikterge, sonymen qatar basqa da aspektilerge qoıylatyn eń tómengi talaptar kelisilip, usynymdar retinde jergilikti atqarýshy organdarǵa jiberilgenin esterińizge salamyz.
Buǵan deıin Bilim jáne ǵylym mınıstrligi jergilikti ákimdikterge tehnıkalyq jabdyqtardy jetkizýshilerdi irikteý barysyn qoǵam belsendilerimen, Arnaıy monıtorıngtik top ókilderimen birlesip uıymdastyrýdy usyndy.
