BǴM: Mektep jetispeýshiligi jeke sektor arqyly sheshiledi
ASTANA. QazAqparat - Balabaqshalar sekildi aldaǵy ýaqytta Qazaqstanda memlekettik-jekeshelik áriptestik aıasynda orta bilim beretin mektepter ashylatyn bolady. Bul týraly QR Úkimetiniń baspasóz ortalyǵynda brıfıng ótkizgen QR Bilim jáne ǵylym vıtse-mınıstri Ashat Aımaǵambetov málim etti, dep habarlaıdy QazAqparat tilshisi.
«Apattyq, úsh aýysymdy mektepter týrasynda másele shynynda da bar. Áli sheshilgen joq. Bıyl nemese kelesi jyly ol máseleni birjaqty etemiz dep kesip-piship aıtýǵa óte qıyn. Nege? Sebebi, Almaty nemese Astana qalalary týraly aıtar bolsaq, bul jerde demografııalyq jáne mıgratsııalyq, ýrbanızatsııalyq suraqtar týyndaıdy. Demek, jyl saıyn úlken qalalarǵa adamdar kóptep kóship jatyr. Máselen, bir ǵana Astanaǵa ótken jyly 17 myńdaı bala kelgen. Demek, ótken jyly ǵana bizge qosymsha kem degende 15 mektep salý kerek bolatyn. Demek, másele óte aýqymdy», - deıdi vıtse-mınıstr.
Ashat Aımaǵambetovtyń aıtýynsha, bıyl respýblıkalyq bıýdjet esebinen elimizde 110 mektep salynyp jatyr. Jyldyń sońyna deıin 72 mektepti paıdalanýǵa berý kózdelgen.
«Respýblıkada 127 úsh aýysymdy mektep, 44 apattyq mektep bar. Bul másele jyldan jylǵa aldymyzdan shyǵyp otyr. Biz máseleni respýblıkalyq bıýdjettiń esebimen ǵana sheshý kerek dep otyrǵan joqpyz. Jyl saıyn bizdiń elde júzdegen mektep salynýda. Dese de, bul qarqyn túpkilikti máseleni sheshpeıtinin kórgennen keıin biz jan basyna qaraı qarjylandyrý júıesi arqyly retke keltirgimiz keledi», - deıdi ol.
Vıtse-mınıstrdiń aıtýyna qaraǵanda, birneshe jyl buryn ǵana elimizde mektepke deıingi bilimmen qamtýdyń deńgeıi 66 paıyz bolatyn. Qazir bul kórsetkish - 93 paıyzdyq dárejege jetken.
«Másele qalaı sheshildi? Biz eń aldymen jeke sektordy tarttyq. Memleket basshysynyń bastamasymen «Balapan» baǵdarlamasyn qolǵa aldyq. Memlekettik-jekeshelik seriktestik jumysty jolǵa qoıdyq. Máselen, sońǵy 7 aıda paıdalanýǵa berilgen 40 myń orynnyń 30 myńnan astamy jeke seriktester arqyly ashylǵan. Demek, bizdiń qadam jeke sektordy jigerlendiredi. Pılot bastalady. Ol jeke mektepterde memlekettik tapsyrystar boıynsha jumys júrgiziledi. Biraq, bul rette tegin orta bilim berý báribir saqtalatynyn aıta ketkimiz keledi», - dep túıdi Ashat Aımaǵambetov.
