BǴM mektep oqýlyqtarymen qamtamasyz etýdiń qatań reglamentin qoldanbaq
ASTANA. QazAqparat - Bilim jáne ǵylym mınıstrligi mektepterdi oqýlyqpen jáne oqý-ádistemelik keshenmen qamtamsyz etýdiń qatań reglamentin usynady. Bul týraly búgin Parlament Májilisinde ótken Úkimet saǵatynda Bilim jáne ǵylym mınıstri Aslan Sárinjipov málim etti.
«Biz osy baǵytta aýqymdy jumystar atqarǵan edik, jazdyń sońyna taman barlyq oblystardy qosqanda 100 paıyzdyq qamtamsyz etý týraly habarlanǵan edi. Alaıda, qyrkúıektiń basynda problemalar týyndady, qazir arnaıy komıssııa barlyǵyn anyqtady», - dedi mınıstr. Onyń aıtýynsha, bilim berý uıymdaryn oqýlyqtarmen qamtamasyz etý protsesin birizdendirý maqsatynda oqýlyqtar men oqý-ádistemelik keshendi qamtýdyń qatań reglamentin engizý qajet. Al bul baǵyttaǵy jumys jyl boıy júrgizilmek.
«Soǵan sáıkes, 1 qańtarǵa deıin mektepter kelesi oqý jylyna oqýlyqtarǵa degen qajettilikter boıynsha tolyq aqparattar usynýy tıis. Bul rette aýdandar men qalalardyń demografııalyq kórsetkishteri, mektepke baratyn oqýshylar sany men oqyp jatqandar týraly kórsetkishter qatań eskerilýi shart», - dedi A. Sárinjipov. Budan bólek, onyń aıtýynsha, aldaǵy ýaqytta óńirlerdegi bilim berý basqarmalary turaqty túrde qoldanystaǵy oqýlyqtar qorynyń ınventarızatsııasyn júrgizýge mindetti bolady. Sosyn, qoldanystan shyqqan, eskirgen oqý quraldaryn tapsyrý, olardyń jańa jáne eskirgen ýaqyttaǵy kúıine baǵa berý isin reglamentteý de usynylyp otyr.
«Bunyń aıasynda 10 qańtarǵa deıin mınıstrlik baspa oryndary men jergilikti atqarýshy organdarǵa qoldanýǵa keńes beriletin oqýlyqtar men oqý-ádistemelik keshenniń tizimin bekitetin bolady. 1 aqpanǵa deıin bilim basqarmalary baspa oryndarymen kelisimshart jasasady. Naýryz aıynyń basynda oqýlyqtardy mektepke jetkizý boıynsha konkýrstar bastalady, al sáýirde, zańnamaǵa sáıkes, satyp alý jáne jetkizý potsedýralary aıaqtalýy tıis. Osylaısha, mamyr aıynda oqýlyqtar jetkizile bastasa, tamyzda oqýlyqtar mektepterde tolyq qamtylýy shart», - dedi A. Sárinjipov.
