19:37, 15 Naýryz 2021 | GMT +6
BǴM: Qazaqstan tarıhy boıynsha bazalyq mektep oqýlyǵyn daıarlaý máselesi talqylandy
NUR-SULTAN. QazAqparat - QR Bilim jáne ǵylym mınıstri Ashat Aımaǵanbetov tarıhshy ǵalymdarmen kezdesti. Bul týraly ol Facebook-tegi paraqshasynda habarlady.
«Almaty qalasynda tarıhshy ǵalymdarmen jáne tarıh pániniń muǵalimderimen kezdestim. Jıyn barysynda Memleket basshysynyń «Táýelsizdik bárinen qymbat» atty maqalasynda mindettegen tapsyrmalaryn oryndaý barysyn talqyladyq» dep jazdy mınıstr.
El Prezıdenti Qasym-Jomart Toqaev Qazaqstan tarıhy boıynsha jańa akademııalyq basylymdy, sondaı-aq Qazaqstan tarıhy páni boıynsha biryńǵaı oqýlyqtardy daıyndaýdy tapsyrǵan bolatyn.
«Ǵalymdarmen jáne muǵalimdermen Qazaqstannyń tarıh ǵylymyn damytý tujyrymdamasyn ázirleý máseleleri, Qazaqstan tarıhy boıynsha jańa akademııalyq basylymdy, Qazaqstan tarıhy boıynsha bazalyq mektep oqýlyǵyn daıyndaýdyń uıymdastyrýshylyq jáne ádisnamalyq máseleleri, mektepterde tarıhty oqytý problemalary, onyń ishinde úlgilik baǵdarlama daıyndaý týraly máseleler talqylandy. Bul ortaq jumystyń mańyzy zor.
Bul jumysta naýqanshyldyq pen asyǵystyq bolmaý kerek ekeni de túsinikti» delingen habarlamada.
Vedomstvo basshysy mınıstrlik tarıhshy ǵalymdar men muǵalimderdiń aıtqan usynystary men ıdeıalaryn eskeretinin atap ótti.
«Joǵaryda atalǵan baǵyttar boıynsha jumysqa barlyq tarıhshylardy qatysýǵa shaqyramyn. Óz usynystaryńyzdy Ǵylym komıtetiniń korporatıvtik poshtasyna kn@edu.gov.kz jiberýdi suraımyn» dep túıindegen sózin Ashat Aımanbetov.
Сейчас читают