BǴM ǵylymı jetekshilerdi irikteý krıterııin qarastyra ma

NUR-SULTAN. QazAqparat – QR Bilim jáne ǵylym mınıstrligi ǵylymı jetekshilerdi irikteý krıterıılerin ózgertý boıynsha depýtattardyń usynysyn qarastyrady, dep habarlaıdy QazAqparat tilshisi.

«Qazaqstan Respýblıkasy Bilim jáne ǵylym mınıstrligi (budan ári - Mınıstrlik) Sizdiń 2020 -2022 jyldarǵa arnalǵan ǵylymı jáne (nemese) ǵylymı -tehnıkalyq jobalar boıynsha granttyq qarjylandyrýǵa arnalǵan konkýrstyq qujattamada ǵylymı jetekshilerge qoıylatyn talaptarǵa qatysty ótinishińizdi qarap, kelesini habarlaıdy. «Ǵylym týraly» Zańnyń 17-babynyń 2 -tarmaǵyna sáıkes ǵylymı jáne (nemese) ǵylymı -tehnıkalyq qyzmetti basqarý ǵylymı, ǵylymı-tehnıkalyq jáne ınnovatsııalyq qyzmet sýbektilerin memlekettik qoldaýdyń ekonomıkalyq tıimdiligi men nátıjeliligi qaǵıdattaryna negizdeledi», - dep jazdy QR Bilim jáne ǵylym vıtse-mınıstri Mıras Daýlenov depýtattyq saýalǵa.

Osyǵan baılanysty, onyń aıtýynsha Mınıstrlik óz quzyreti sheńberinde granttyq jáne baǵdarlamalyq -nysanaly qarjylandyrý sheńberinde iske asyrylǵan ǵylymı zertteýlerdi taldaý nátıjelerin eskere otyryp, granttyq qarjylandyrý jobalarynyń ǵylymı jetekshilerine qoıylatyn talaptardy kúsheıtken.

«Sondaı -aq Qazaqstan Respýblıkasynda bilim berýdi jáne ǵylymdy damytýdyń 2020 -2025 jyldarǵa arnalǵan memlekettik baǵdarlamasynda negizgi nysanaly ındıkator retinde Web of Science (Clarivate Analytics) jáne Scopus (Elsevier) platformasyndaǵy aqparattyq resýrstardyń derekteri boıynsha reıtıngtik basylymdarda jarııalanymdar paıdalanylady. Otandyq ǵalymdardyń halyqaralyq jýrnaldardaǵy jarııalanym belsendiligi joǵaryda atalǵan ındıkatorǵa qol jetkizý jáne elimizdiń jetekshi álemdik reıtıngterdegi ornyn anyqtaý úshin qajet. Bul rette, 2020 jylǵy 27 mamyrdaǵy Ulttyq qoǵamdyq senim keńesiniń otyrysy barysynda Memleket basshysy el ekonomıkasynyń naqty sektorynyń qajettilikterine baǵyttalǵan ǵylymı jumystar men zertteýlerdi qarjylandyrý maqsatynda áleýmettik-ekonomıkalyq, óndiristik jáne tehnıkalyq qaıtarymy bar árbir ǵylymı jobadan naqty nátıjelerge qol jetkizý qajettigin atap ótti», - dep jazdy vıtse-mınıstr.

«Sonymen birge, Sizderdiń usynystaryńyz 2021-2023 jyldarǵa arnalǵan ǵylymı jáne (nemese) ǵylymı-tehnıkalyq jobalar boıynsha granttyq qarjylandyrýǵa arnalǵan aldaǵy konkýrsqa konkýrstyq qujattamany ázirleý kezinde qarastyrylatynyn habarlaımyz», - dedi ol.

Buǵan deıin Parlament Májilisiniń depýtattary Bilim jáne ǵylym mınıstriniń atyna saýal joldaǵan bolatyn, onda birqatar baǵyttar boıynsha ǵylymı jetekshilerdi irikteý krıterıılerin kúsheıtý usynyldy. Avtory: Azamat Syzdyqbaev