BǴM-ge joǵary oqý oryndarynda otbasylyq psıholog daıyndaıtyn kafedralar ashý týraly usynys jasalmaq
ASTANA. QazAqparat - Bilim jáne ǵylym mınıstrligine depýtattyq saýal joldap, joǵary oqý oryndarynda otbasylyq psıholog daıyndaıtyn kafedralar ashý týraly usynys jasaý josparlanýda. Bul týraly QR Parlamenti Májilisiniń depýtaty Orazgúl Asanǵazy aıtty.
«Men Bilim jáne ǵylym mınıstrligine depýtattyq saýal joldap, joǵary oqý oryndarynda otbasylyq psıholog daıyndaıtyn kafedralar ashý týraly usynys jasaýdy josparlap júrmin. Máselen, Máskeýde birneshe jyldan beri joǵary oqý oryndarynda otbasylyq psıholog daıyndaıtyn fakýltetter bar. Biz táýelsizdik alǵaly beri mundaı máseleni kótergen emespiz. Osy mamandyq bizge óte qajet. Árıne, psıhologııanyń salalary óte kóp, al bizge qazirgi kezde eń keregi otbasylyq psıhologııany jetik biletin mamandar bolyp otyr», - dep atap ótti ol. Sonymen qatar halyq qalaýlysy qazirgi kezde ul men qyzdy tárbıeleýdiń óte qıyn ekeni jasyryn emestigin basa aıtty. Ásirese, óte ózgerip, kúrdelengen mektep baǵdarlamasymen birinshi synypqa daıyndaý bala úshin óte qıynǵa soǵady. Sondyqtan Astanada Bilim jáne ǵylym mınıstrliginiń qoldaýymen Ata-analar ýnıversıteti qurylǵan. «Men alǵashqy jyldardan bastap atalǵan ýnıversıtetti basqaratyn Sofııa Evdokımovanyń elimizdiń túkpir-túkpirindegi psıhologtardy jınap, olarǵa Máskeýden, Almatydan, Astanadan tájirıbeli psıhologtardy shaqyryp, lektsııa oqytqanyn jaqsy bilemin. Balany mektepke bergen kezde, balamen birge ata-anasy da daıyndalýy kerek. Mine, osy turǵydan Ata-analar ýnıversıteti óte jaqsy jumys istep jatyr», - dedi depýtat. Onyń málimetinshe, sondaı sharalardyń biri erteń ótedi. «Búkil respýblıka boıynsha 1500 psıholog ata-analarǵa lektsııa oqıdy. Jalpy, qazirgi kezde kez kelgen ata-anaǵa óz máselesimen ózi ǵana qalýy óte qıyn. Sondyqtan ǵalymdardyń, zertteýshilerdiń, tájirıbeli ustazdardyń tájirıbesin jınaqtap, zerttep, zerdelep, qaı jerinde kemshilik bar degendi baqylap otyrǵan osy ınsıtıtýt», - dep atap ótti O.Asanǵazy.
