BǴM bıylǵy UBT-da kereǵar saýaldardyń bolmaıtyndyǵyna senimdi
ASTANA. QazAqparat - Bıylǵy ulttyq biryńǵaı testte kereǵar suraqtar bolmaıdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte elimizdiń Bilim jáne ǵylym mınıstrligi Bilim jáne ǵylym salasyndaǵy baqylaý komıtetiniń tóraǵasy Saıat Núsipov málim etti.
Brıfıng barysynda BAQ ókilderi aǵymdaǵy jyly Aqtóbede úsh jasóspirimniń óz-ózine qol jumsaǵanyn, muny keıbireýler oqýshylardyń UBT-dan qorqýynan oryn alǵan jaıt dep baǵalaýyn atap ótip, osy máselege baılanysty S.Núsipovten túsinik berýin suraǵan edi.
«Bul óte kúrdeli másele. Óıtkeni, árbir balanyń jaǵdaıy biz úshin óte mańyzdy. Aqtóbede bolǵan jáne basqa da jaǵdaılarda tergeý jumystary júrgizilip jatyr. Sondyqtan ol aıaqtalmaıynsha anyq málimet berýge múmkinshilik joq», - dedi ol óz jaýabynda.
Sonymen qatar Saıat Núsipov test tapsyrýda oqýshylar óz kúshine senýi kerektigin, test sapasy jyldan-jylǵa jaqsaryp otyrǵanyn basa aıtty.
«Sondyqtan baspadan ne bolmasa basqa da bir qatelikter oryn almasa, biz kereǵar suraqtardyń bolmaıtyndyǵyna senimdimiz. Barlyq test suraqtary mektep oqýlyqtarynan engiziledi», - dedi komıtet basshysy.
