BǴM aýyldaǵy mektep muǵalimderiniń áleýetin kótermek
ASTANA. QazAqparat - Qazaqstan Respýblıkasy Bilim jáne ǵylym mınıstrligi Dúnıejúzilik bankimen birlese «Orta bilim júıesin modernızatsııalaý» jobasyn resmı iske qosý boıynsha is-shara ótkizedi. Bul týraly QazAqparat mınıstrliktiń baspasóz qyzmetine silteme jasap habarlaıdy.
Jobanyń negizgi baǵyttarynyń biri - aýyldyq jerde orta bilim beretin mektepterdegi oqýshylardyń úlgerimderin - aýyldyq mektep muǵalimderiniń áleýetin arttyrý jáne bilim ordalaryn mýltımedıalyq qural-jabdyqpen qamtamasyz etý arqyly jaqsartý.
Jobanyń jalpy quny - respýblıkalyq bıýdjetpen qarjylandyrylatyn salyqty qosa eseptegende 75 mln AQSh dollary.
Josparǵa sáıkes, bul qarajatqa aýyldyq mektepterge oqý materıaldary men mýltımedıalyq qural-jabdyqtar satyp alynyp, bilim berý baǵdarlamalary jaqsartylatyn bolady. Sondaı-aq, aýyldyq mektepterdegi muǵalimderdiń áleýetin arttyrý boıynsha sharalar qoldanylyp, erekshe qajettilikteri bar balalarǵa qoldaý kórsetiledi. Joba sheńberinde bilim berýdiń jańartylǵan mazmunyn qoldaýǵa baǵyttalǵan bastamalar kesheni júzege asyrylady dep kútilýde.
Oqýshylardyń oqýdaǵy jetistikteri oqý jáne materıaldyq-tehnıkalyq resýrstardyń úlestirilýine tikeleı baılanysty bolǵandyqtan, joba sheńberinde josparlanǵan is-sharalar elimizdegi árbir mekteptiń jaǵdaıynyń jaqsarýyna, sondaı-aq oqýshylardyń úlgerimderi arasyndaǵy aıyrmashylyqty joıyp, aýyl jáne qala mektepterindegi bilim sapasyn teńestirýge septigin tıgizetin bolady. Ulttyq deńgeıde atalmysh joba elimizdiń turaqty damýy úshin adamı kapıtaldyń nyǵaıýyna áser etpek. Joba nátıjeleri barsha qoǵamǵa áleýmettik-ekonomıkalyq turǵyda jaǵymdy áser etip, Qazaqstannyń básekege qabilettiligin arttyra túsedi dep josparlanýda. «Orta bilim júıesin modernızatsııalaý» jobasyn resmı iske qosý aıasynda ótetin sessııaǵa bilim jáne ǵylym vıtse-mınıstri Elmıra Sýhanberdıeva, Dúnıejúzilik bankiniń bilim berý tájirıbesi jónindegi basqarýshysy Garrı Antonı Patrınos, Dúnıejúzilik bankiniń Qazaqstandaǵy turaqty ókili Ato Braýna, Dúnıejúzilik bankiniń Ortalyq Azııadaǵy mamany Sıýzanna Aırepetıan, BI-Group bas dırektory jáne IQanat jobasynyń negizin qalaǵan Aıdyn Rahımbaev qatysady.
