Bezos pen Sanchestiń úılený toıynyń sońǵy kúni narazylyq aktsııalaryna ulasty
ASTANA. KAZINFORM — «Eksplýatatsııa men tutynýǵa jol joq!» degen uranmen júzdegen adam Amazon kompanııasynyń negizin qalaýshy Djeff Bezos pen telejúrgizýshi Loren Sanchestiń úılený toıy ótken Venetsııa kóshelerimen narazylyq sherýin ótkizdi, dep jazady Euronews.
Venetsııada Amazon negizin qalaýshysy Djeff Bezos pen telejúrgizýshi Loren Sanchestiń úılenýine arnalǵan saltanatty sharalar aıaqtaldy. «Ǵasyr toıy» atalyp ketken sán-saltanattyń jalpy quny shamamen 42 mıllıon eýroǵa baǵalanǵan. Merekelik sharalar beısenbiden bastap birneshe kúnge sozyldy. Osy ýaqyt ishinde qalada narazylyq sharalary da toqtaǵan joq.
Senbi kúni júzdegen adam Venetsııanyń kósheleri men alańdarymen sherý ótkizip, óz narazylyǵyn bildirdi.
«Bezosqa oryn joq!» atty naýqan uıymdastyrýshylardyń biri «adamdar toıdyń ózine emes, Venetsııany tek tutyný úshin keletin orynǵa aınaldyrýǵa qarsy narazylyq bildirýde» deıdi. Aktıvıst Marta Sottorıva Bezosty «qanaýdyń esebinen baılyqqa kenelgen adamnyń sımvoly» dep atady.
Narazylyq sharalary juldyzdy jup pen olardyń qonaqtary Lagýnaǵa kelmeı turyp birneshe kún buryn bastalǵan. Juma kúni keshke, úılený toıynyń qarsańynda Leonardo Dı Kaprıo, Kardashıan apaly-sińlileri, Tom Bredı, Orlando Blým, Ivanka Tramp pen Bıll Geıts sııaqty juldyzdar men tanymal kásipkerler bar VIP-qonaqtar jınalǵan sátte Áýlıe Mark alańyndaǵy qońyraý munarasynda «Patshalarǵa jol joq, Bezosqa da jol joq. Olıgarhtar ketsin!») degen sózder lazermen proektsııalandy.
Sársenbide belsendiler jalǵan dollarlarǵa toly qoldary bar Amazon qoraby beınesindegi qýyrshaqty Grand-kanalǵa aǵyzyp jiberdi.
Alǵashynda toıdy Scuola Grande della Misericordia ǵımaratynda ótkizý josparlanǵan, alaıda narazylyqtar áserinen mereke qalanyń ortalyǵynan tys ornalasqan venetsııalyq Arsenalǵa aýystyryldy.
BAQ málimetinshe, bul «ǵasyr toıy» Venetsııaǵa jyldyq týrıstik tabysynyń 70%-yna deıin paıda ákelgen bolýy múmkin edi.
Budan buryn 18 maýsymda venetsııalyq belsendiler Djeff Bezostyń toıyna qarsylyq tanytyp jatqanyn jazǵan edik.