Beıjińdegi sý tasqyny 30 adamnyń ómirin qıdy

ASTANA. KAZINFORM — Qytaı astanasy Beıjińde 26 shildeden bastap nóser jaýyn quıdy, arty sý tasqynyna ulasty. 28 shildede qyzyl dabyl jarııalanyp, turǵyndarǵa qajetsiz syrtqa shyqpaý, al kásiporyndarǵa qyzmetkerlerdi jumysqa shaqyrmaý týraly eskertý jasaldy. 29 shildedegi sońǵy málimetterge súıensek, Beıjińdegi sý tasqyny 30 adamnyń ómirin qıǵan.

Sınhýa málimetinshe, 28 shilde 24:00-ge deıin Beıjińniń soltústik-shyǵysyndaǵy taýly aımaqta ornalasqan Mııýn aýdanynda jaýyn-shashyn mólsheri 543,4 mıllımetrge jetip, 28 adam qaza tapty. Beıjiń qalasy boıynsha ortasha jaýyn-shashyn mólsheri 165,9 mıllımetrdi qurady. Soltústik-batystaǵy ıAntsın aýdanynda eki adam qaıtys boldy.

Zardap shekken aımaqtarda 31 jol bóligi qırap, 136 aýylda elektr qýaty úzildi, sondaı-aq qoǵamdyq baılanys ınfraqurylymy da aıtarlyqtaı zaqymdandy. Qazirgi ýaqytta Beıjiń qalasy boıynsha 80 332 adam qaýipsiz jerge kóshirildi.

Aıta keterligi, zardap shekken aımaqtar ákimshilik jaǵynan Beıjiń qalasyna qaraǵanymen, negizinen aýyldyq jerlerdi qamtıdy.

Dúısenbi kúni keshke, qaza bolǵandar sany jarııalanar aldynda resmı BAQ Qytaı basshysy Sı Tszınpınniń sheneýnikterge sý tasqynyna qarsy sharalar men qutqarý jumystaryn kúsheıtýdi tapsyrǵanyn habarlady.

Aıta keteıik, QHR Sý sharýashylyǵy mınıstrligi janyndaǵy Haıhe ózeniniń sý sharýashylyǵy isteri komıteti Lýanhe ózeninde dúısenbi kúni bolǵan tasqyn eldiń negizgi ózenderiniń arasynda 2025 jyly «nómir birinshi sý tasqyny» sanatyna jatqyzylǵanyn habarlaǵan bolatyn.