Beıjińdegi robottar jarysynda kóshe bıi kórermen nazaryn aýdardy – sheteldegi qazaq baspasózi

«Altaıym» telehıkaıasy Qytaı televızııasynyń «Altyn búrkit» syılyǵyna tórt atalym boıynsha usynyldy – Jenmın jıbao

Qytaıdyń Shyńjań óńirindegi jazýshy Lı Jýannyń attas shyǵarmalar jınaǵy negizinde túsirilgen «Altaıym» qysqametrajdy telehıkaıasy Qytaı televızııasynyń «Altyn búrkit» syılyǵynyń tórt atalymy boıynsha usynyldy, dep habarlaıdy «Jenmın jıbao».

Qytaılyq basylymnyń keltirgen derekterine súıensek, 25 tamyzda Qytaı televızııasynyń 33-shi kezekti «Altyn búrkit» syılyǵyna úmitkerlerdiń resmı tizimi jarııalandy. Tizimge sáıkes, «Altaıym» telehıkaıasy «Úzdik teletýyndy», «Úzdik stsenarıı», «Úzdik rejısser» jáne «Úzdik áıel róli» atalymdary boıynsha usynylǵan.

«Altaıym» telehıkaıasy Shyńjań jazýshysy Lı Jýannyń jeliles shyǵarmalar jınaǵy negizinde túsirilgen. Týyndyda Altaı óńiriniń tabıǵaty, turmys-tirshiligi men jergilikti halyqtyń ómiri kórkem baıandalady.

Aıta keteıik, Qytaı televızııasynyń «Altyn búrkit» syılyǵy – eldegi televızııa óneri salasyndaǵy bedeldi marapattardyń biri. Syılyqqa usynylǵan týyndylar men shyǵarmashylyq top músheleri Qytaı televızııa ındýstrııasynyń jyl ishindegi úzdik jetistikterin tanytatyn mańyzdy jobalar sanalady.

– «Altaıymnyń» birden tórt negizgi atalym boıynsha usynylýy – týyndynyń kórkemdik deńgeıi men ıdeıalyq mazmunyna, sondaı-aq Shyńjań taqyrybyndaǵy televızııalyq shyǵarmalardyń damýyna berilgen joǵary baǵa retinde baǵalanyp otyr, – dep jazady qytaılyq BAQ

Aıta keteıik, «Altaıym» telehıkaıasy Shyńjańnyń jergilikti taqyryptaryn zamanaýı televızııalyq formatta kórsetýimen erekshelenedi.

Qazaqstan men Ózbekstan ıadrolyq jáne ekologııalyq qaýipsizdik máselelerin talqylady – ÓzA

Ózbekstanda Qazaqstan men Ózbekstan ókilderi ıadrolyq, radıatsııalyq jáne ekologııalyq qaýipsizdik máselelerin talqylady. «Ýzatom» agenttiginde ótken kezdesýge Ózbekstannyń tıisti mınıstrlikteri men vedomstvolarynyń ókilderi, sondaı-aq QR Ekologııa jáne tabıǵı resýrstar mınıstriniń orynbasary Mansur Oshýrbaev bastaǵan qazaqstandyq delegatsııa qatysty. Bul týraly osy aptada «ÓzA» aqparat agenttigi málimdedi.

Habarlamada aıtylǵandaı, taraptar Ózbekstanda júzege asyrylyp jatqan atom elektr stantsııasy jobasynyń tehnıkalyq jáne ekologııalyq aspektileri, qaýipsizdik sharalary men ekologııalyq monıtorıng júıesi jóninde pikir almasty.

«Ýzatom» agenttiginiń dırektory Azım Ahmedhojaev atom baǵdarlamasyn iske asyrýda qaýipsizdik basty basymdyq ekenin atap ótti. Onyń aıtýynsha, ulttyq talaptar halyqaralyq standarttarmen úılestirilip, ıadrolyq, radıatsııalyq jáne ekologııalyq qaýipsizdik júıesi kezeń-kezeńimen qalyptastyrylyp jatyr. Qazaqstan tarapy óńirde atom energetıkasyn qaýipsiz damytý jáne ekologııalyq qaýipsizdik salasynda tájirıbe almasýdyń mańyzyn atap ótti.

Taraptar yntymaqtastyqty jalǵastyrýǵa, «Jol kartasyn» ázirleýge jáne sarapshylar arasyndaǵy turaqty dıalogty jolǵa qoıýǵa kelisti.

Irannyń «Sepehr týraly ańyz» mýltfılmi Reseı kınoteatrlarynda kórsetile bastady – Eurasia Today

Irannyń «Sepehr týraly ańyz» anımatsııalyq fılmi Reseıdiń 89 kınoteatrynda prokatqa shyqty. Osyǵan oraı Máskeýde fılmniń tusaýkeser rásimi ótip, shara Irannyń Mınab qalasynda qaza tapqan balalardy eske alýǵa arnaldy. Іs-sharaǵa Irannyń Reseıdegi elshisi Kazem Djalalı, kıno salasynyń ókilderi men kórermender qatysty, dep habarlaıdy Eurasia Today aqparat agenttigi. 

Atalǵan basylymnyń dereginshe, Iran elshisiniń aıtýynsha, rásim barysynda Mınabtaǵy «Shajara Taıııba» mektebinde qaza tapqan oqýshylardyń fotosýretteri kórsetildi. Ol mýltfılmniń Reseı kınoteatrlarynda kórsetile bastaýy eki el arasyndaǵy mádenı baılanystardy nyǵaıtýǵa yqpal etetinin atap ótti.

«Sepehr týraly ańyz» — otbasy, jaýapkershilik pen batyldyq qundylyqtaryn arqaý etken otbasylyq anımatsııalyq fılm. Sıýjette jasóspirim Sepehr men onyń serigi Babýdyń otbasy men Otanyn qorǵaý úshin qaýipti saparǵa attanýy baıandalady.

Sondaı-aq osy aptada Eurasia Today basylymy «Irannyń Qytaıǵa munaı eksporty ózgerissiz jalǵasýda» degen taqyryptaǵy aqparat jarııalandy.

AQSh-tyń Iranǵa ekonomıkalyq qysymdy kúsheıtý áreketterine qaramastan, Iran munaıynyń Qytaıǵa eksporty ózgerissiz jalǵasyp jatyr. Eýrazııa Týdeıdiń «New York Times» basylymyna silteme jasap habarlaýynsha, Qytaı munaı óńdeý zaýyttary táýligine shamamen 1,2 mln barrel Iran munaıyn qabyldaýda. Bul ótken jylǵy kórsetkishpen shamalas.

Munaı saýdasy sanktsııalardy aınalyp ótý tetikteri, sonyń ishinde kemeden kemege júk tıeý jáne tólemderdi ıýan nemese krıptovalıýta arqyly júrgizý tásilderi arqyly júzege asyrylyp jatyr.

AQSh Iranǵa qysymdy arttyrýǵa umtylǵanymen, Qytaıdyń iri bankteri men qarjy ınstıtýttaryna ekinshi rettik sanktsııalar engizýge ázirge barmaı otyr. Basylymnyń jazýynsha, Vashıngton mundaı qadamnyń Pekınmen aradaǵy saýda qatynastaryna keri áser etýinen qaýiptenedi. Osyǵan baılanysty AQSh ákimshiligi Iranǵa qarsy sanktsııalyq qysymdy kúsheıtý men Qytaımen ekonomıkalyq baılanystardy saqtaýdyń arasyndaǵy tepe-teńdikti izdep otyr.

Beıjińdegi robottar jarysynda kóshe bıi kórermen nazaryn aýdardy – CNR

Beıjińdegi Memlekettik muz aıdynynda II Dúnıejúzilik adam pishindi robottar sport jarysy ótip jatyr. Bıylǵy doda baǵdarlamasyna birneshe jańa sport túri engizilip, olardyń qatarynda kóshe bıi men sporttyq bı kórermenderdiń erekshe nazaryn aýdardy, dep habarlaıdy Qytaıdyń Ortalyq halyq radıosy.

Atalǵan BAQ-tyń dereginshe, jarys barysynda adam pishindi robottar qozǵalysty basqarýdyń kúrdeli elementterin meńgerip, mýzykanyń yrǵaǵyna dál ilesip, túrli bı qımyldaryn oryndady. Robottardyń kúrdeli ári úılesimdi qozǵalystary olardyń tehnıkalyq múmkindikterin kórsetip, jarysqa qatysýshylardyń joǵary deńgeıdegi tehnologııalyq ázirligin tanytty.

Sonymen qatar osy aptada «CNR» basylymynda «Adam pishindi robot 100 metrge júgirýden adamzat rekordyn jańartty» degen taqyrypta aqparat jaryq kórdi.

Keltirilgen derekterge súıensek, Beıjińde ótip jatqan II Dúnıejúzilik adam pishindi robottar sport jarysy aıasyndaǵy 100 metrge júgirýden daıyndyq básekesinde adam pishindi robot adamzattyń osy qashyqtyqtaǵy rekordyn jańartty. Jarysta «Tıanchjo» komandasynyń roboty qashyqtyqty 9,39 sekýndta júgirip ótip, buǵan deıingi óz nátıjesin jaqsartty. Sondaı-aq ol adamzattyń 100 metrge júgirýdegi 9,58 sekýndtyq álemdik rekordyn basyp ozdy.

Jarys bastalǵan sátte úsh robot bir mezette júgirip, «Tıanchjo» komandasynyń roboty men «Fyńhýo Shandıan» komandasynyń roboty márege deıin qatarlasa jarysty. Qashyqtyqtyń sońǵy bóliginde «Tıanchjo» roboty jyldamdyǵyn arttyryp, qarsylasynan ozyp shyqty. Nátıjesinde adam pishindi robottar arasyndaǵy 100 metrlik jarysta jańa rekord tirkeldi.

Qorǵas halyqaralyq ortalyǵyna bıyl 5 mıllıonnan astam adam kirip-shyqty – Halyq gazeti

Qytaı-Qazaqstan Qorǵas halyqaralyq shekara yntymaqtastyq ortalyǵyna bıyl kirip-shyqqandar sany 5 mıllıonnan asty.

Bul týraly osy aptada Qytaıdyń Halyq gazeti basylymy habarlady.

Atalǵan BAQ-tyń málimetinshe, 13 tamyzǵa deıin ortalyqqa kelgenderdiń jalpy sany 5,12 mıllıon adamǵa jetken. Týrıstik maýsym kezinde shekaralyq sapar, transhekaralyq saıahat jáne saýda týrızmine qyzyǵýshylyq artyp, ortalyqqa táýligine 30 myńnan astam adam kelip jatyr.

Kelýshiler sanynyń ósýine baılanysty ortalyqtyń birlesken tekserý zalyndaǵy barlyq ótkizý joldary iske qosyldy. Atap aıtqanda, 32 arnaıy qyzmetker tekseretin jol jáne 22 jedel tekserý joly tolyq jumys istep tur.

Bishkekte kóshe attary ulttyq sıpatqa ıe boldy – TRT

Bishkekte ákimshilik-aýmaqtyq reformadan keıin kóshe ataýlaryn retke keltirý jumystary júrgizildi. Qaıtalanatyn ataýlardy joıý jáne kólik baǵyttaryn ońtaılandyrý maqsatynda birqatar kóshe men dańǵyl biriktirilip, olarǵa qyrǵyzdyń ulttyq tarıhy men mádenıetine qatysty jańa ataýlar berildi. Bul týraly osy aptada Túrkııa Radıo Televızııa portaly habarlady.

Atalǵan BAQ-tyń keltirgen málimetterine súıensek, qalalyq keńes sheshimine sáıkes, negizgi magıstraldardyń qatarynan «7 sáýir», Pýteprovodnaıa, Molodaıa gvardııa, Selektsıonnaıa, Mýromskaıa, Pobeda, Vasılevskıı trakt, Maksım Gorkıı jáne basqa da ataýlar alynyp tastaldy. Endi qaladaǵy negizgi dańǵyldar men kósheler Shý, Jibek joly, Shyńǵys Aıtmatov, Aaly Toqombaev, Manas, Shabdan batyr, Júsip Abdrahmanov, Qurmanjan Datqa, Imanaly Aıdarbekov, Absamat Masalıev jáne Ankara sııaqty ataýlarmen belgilenedi.

Ózgerister aıasynda birneshe kóshe bir ataýǵa biriktirildi. Máselen, Shý, Den Sıaopın(Qytaıdyń burynǵy kóshbasshysy), Shabdan batyr jáne birqatar magıstraldar Shý dańǵylynyń quramyna ense, Shý men Jibek joly jáne Pobeda dańǵyldary Jibek joly dańǵyly bolyp biriktirildi.

Maksım Gorkıı men Ankara kósheleri Ankara kóshesi, Lev Tolstoı, Pýteprovodnaıa jáne Sary-Ózen kósheleri Shabdan batyr kóshesi bolyp qaıta ataldy. Ákimshilik aýmaqtyń keńeıýine baılanysty engizilgen ózgeristerden keıin Bishkek merııasy qoǵamdyq kólik baǵyttaryn, aıaldama aqparattaryn, kadastrlyq jáne tsıfrlyq mekenjaı kartalaryn jańartýdy josparlap otyr.

Sondaı-aq osy aptada «TRT» basylymynda «Reseı munaıy Qazaqstanda óńdeledi» degen taqyryptaǵy aqparat jaryq kórgenin aıta ketý kerek. 

Keltirilgen derekterge súıensek, Qazaqstan men Reseı Reseı munaıyn Batys Qazaqstan oblysyndaǵy «Kondensat» munaı óńdeý zaýytynda óńdeý sharttary boıynsha kelisimge keldi.

Bul týraly túrkııalyq BAQ QR Energetıka mınıstri Erlan Aqkenjenov baspasóz máslıhatyna silteme jasap málimdedi.

Erlan Aqkenjenov aıtýynsha, óńdelgen munaıdan alynatyn ónimniń shamamen 30 paıyzy Qazaqstannyń ishki naryǵynda qalady, al qalǵan bóligi Reseıge jóneltiledi. Reseı munaıy zaýytqa temirjol arqyly jetkiziledi. Óıtkeni kásiporyn geografııalyq ornalasýyna baılanysty Qazaqstannyń da, Reseıdiń de munaı qubyry jelisine qosylmaǵan.

Mınıstrdiń málimetinshe, Reseı munaıyn «Kondensat» zaýytyna jetkizý jaqyn arada bastalýy múmkin. Qazirgi ýaqytta kásiporynda qaıta jańǵyrtý jáne óndiristik qýatyn arttyrý jumystary júrgizilip jatyr. Zaýyt Batys Qazaqstan oblysynda, Reseı shekarasyna jaqyn ornalasqandyqtan, munaı jetkizý kólemi temirjol tasymalynyń múmkindigine baılanysty bolady.