Beıjińdegi Qazaqstan mádenı ortalyǵy: ulttyq muramyzdyń jańa kókjıegi
ASTANA. KAZINFORM – 2025 jyldyń qyrkúıeginde Beıjińde Qazaqstan Respýblıkasynyń alǵashqy mádenı ortalyǵy ashyldy. Bul – sheteldegi tuńǵysh ári ázirge jalǵyz qazaqstandyq mádenı ortalyq.
Ortalyq Beıjińniń iskerlik aýdanynda, Lıanmahe ózeniniń jaǵalaýynda ornalasqan zamanaýı «21 ǵasyr» bıznes-kesheninde, Qytaıdyń halyqaralyq jastar almasý ortalyǵynyń quramynda ashyldy.
Aýmaǵy 620 sharshy metr ortalyq qazaq mádenıetin, tilin, ónerin, tarıhyn jáne ulttyq taǵamdaryn Qytaı aýdıtorııasyna tanystyrýǵa arnalǵan biregeı alań bolmaq.
Mádenı ortalyqtyń ashylýy – ekijaqty dıplomatııalyq kelissózderdiń nátıjesi.
2022 jyly QHR Tóraǵasy Sı Tszınpınniń Astanaǵa memlekettik sapary kezinde Prezıdent Qasym-Jomart Toqaevpen birge eki elde mádenı ortalyqtar ashý týraly ýaǵdalastyqqa qol jetkizildi.
2023 jyldyń qarashasynda Astanada eki el úkimetteri arasynda ózara mádenı ortalyqtar qurý týraly kelisimge qol qoıyldy. Al 2025 jyldyń 22 mamyrynda QR Úkimetiniń qaýlysymen «Beıjiń qalasyndaǵy Qazaqstan mádenı ortalyǵy» qurylyp, ol QR Mádenıet jáne aqparat mınıstrliginiń qaramaǵyna berildi.
Ortalyqtyń basty maqsaty – qazaq mádenıetin jáne Qazaqstannyń týrıstik áleýetin Qytaıda dáripteý. Munda mádenı, gýmanıtarlyq jáne bilim berý is-sharalary ótip, eki el arasyndaǵy baılanystardy nyǵaıtýǵa úles qosady.
Ortalyq birneshe fýnktsıonaldy aımaqqa bólingen:
- Ekspozıtsııalyq aımaq: 100-den astam tarıhı jádiger, sonyń ishinde Saq dáýiriniń kóshirme jádigerleri, Esik jáne Berel qorǵandarynan tabylǵan zattar, qazaq halqynyń turmystyq buıymdary («sandyq», «astaý», «syrmaq»), dástúrli áıel áshekeıleri, dombyra men qobyz sııaqty mýzykalyq aspaptar qoıylǵan. Mýltımedııalyq ekrandar arqyly Qazaqstannyń tabıǵı jáne mádenı kórikti jerleri týraly derekti fılmder kórsetiledi.
- Qazaq tili kabıneti: Balalar men eresekterge arnalǵan sabaqtar men trenıngter uıymdastyrylady, qazaq tilin úırenýge múmkindik beredi.
- Mýzyka jáne shyǵarmashylyq kabınetteri: Qytaılyq qonaqtar dástúrli qazaq mýzykasymen tanysyp, dombyra men qobyzda oınaýdy úırenýge arnalǵan sheberlik sabaqtaryna qatysa alady. Ortalyqta qazaqstandyq mýzykanttar men ártisterdiń qatysýymen kontsertter ótkiziledi.
- Kitaphana jáne oqý zaly: Qazaqstandyq avtorlardyń túrli janrdaǵy shyǵarmalary, sonyń ishinde qytaı tilindegi aýdarmalary usynylady. Abaıdyń eńbekteri basty eksponattardyń biri bolyp sanalady. Kitaphanada dárister, ádebı keshter men tanystyrylymdar ótip, qytaılyq aýdıtorııanyń qazaq ádebıetine degen qyzyǵýshylyǵyn arttyrady.
- Kópfýnktsıonaldy alańdar: Kórmeler, ǵylymı konferentsııalar, dóńgelek ústelder men sımpozıýmdarǵa arnalǵan. Bul is-sharalar eki eldiń mádenı jáne bilim berý baılanystaryn nyǵaıtady.
- «Sandyq» meıramhanasy: Qazaqtyń ulttyq taǵamdarynan dám tatýǵa jáne olardy daıyndaý boıynsha sheberlik sabaqtaryna qatysýǵa bolady.
Ortalyq aldaǵy jartyjyldyqta Qytaıdyń halyqaralyq jastar almasý ortalyǵymen birlesip, eki eldiń jas kásipkerleri, ǵalymdary men shyǵarmashylyq ókilderi arasynda tájirıbe almasýdy josparlap otyr. Sondaı-aq Beıjiń til jáne mádenıet ýnıversıtetimen yntymaqtastyq memorandýmyna qol qoıý arqyly stýdentter arasynda turaqty tájirıbe almasý baǵdarlamasy iske qosylmaq.
Qazaq kınosy, teatry, mýzykasy men ónerine arnalǵan festıvalder ortalyqtyń turaqty is-sharalaryna aınalady. Beıjińdegi Qazaqstan mádenı ortalyǵy ulttyq muramyzdy álemdik arenada tanystyrýdyń jańa kókjıegin ashyp, halyqaralyq mádenı yntymaqtastyqtyń mańyzdy bólshegi bolmaq.
Aıta keteıik, QR Ulttyq mýzeıde «Oǵyz dalalyq mádenıetiniń izderi» atty halyqaralyq kórme ótti.