Beıjińdegi robottardyń ІІ Dúnıejúzilik oıyndaryna 666 komanda qatysady
ASTANA. KAZINFORM – 22-26 tamyz aralyǵynda Beıjińde gýmanoıd robottardyń ekinshi dúnıejúzilik oıyndary (World Humanoid Robot Games) ótedi, dep habarlaıdy Sınhýa agenttigi.
Bıyl jarys baǵdarlamasyna 51 sporttyq jáne praktıkalyq dıstsıplına boıynsha 1301 saıys engizilgen. Oǵan álemniń 16 elinen 666 komanda jáne 2056 robot qatysady. Alǵashqy oıyndarmen salystyrǵanda komandalar sany 138%-ǵa, al robottar sany tórt ese artqan.
Jarystar Beıjińdegi «Muz taspasy» ulttyq konkı tebý stadıonynda ótedi.
Uıymdastyrý komıteti tóraǵasynyń turaqty orynbasary, Beıjiń qalalyq ekonomıka jáne aqparattyq tehnologııalar basqarmasynyń dırektory Tszıan Gýanchjıdiń aıtýynsha, bıyl baǵdarlamaǵa uzyndyqqa sekirý, aýyr atletıka, arqan tartý, ústel tennısi jáne basqa da joǵary qarqyndy saıystar qosylǵan.
– Bul jarystar robottardyń konstrýktsııasy men olardyń negizgi komponentteri úshin úlken synaq bolmaq, – dedi ol.
Budan bólek, robottar naqty jumys jaǵdaılaryna barynsha jaqyn ortada synalady. Olar ónerkásip, qonaqúı bıznesi, úı sharýashylyǵy, logıstıka jáne basqa salalardaǵy tapsyrmalardy oryndaıdy.
Robot qoldarynyń eptiligin tekserýge arnalǵan jeke jarystar da qarastyrylǵan. Olardyń arasynda bólshekterdi jınaý jáne berý, turmystyq jumystardy oryndaý, órt sóndirý-qutqarý operatsııalary men kitaptardy suryptaý bar.
Uıymdastyrýshylardyń aıtýynsha, jarystar barysynda ázirlengen erejelerdiń edáýir bóligi keıin robottardy tehnıkalyq qabyldaýdyń praktıkalyq standarttaryna aınalýy múmkin. Osylaısha jarystar jańa tehnologııalardy synaqtan ótkizip qana qoımaı, gýmanoıd robottar óndirisiniń damýyna yqpal etpek.
Aıta keteıik, jýyrda ǵana qazaqstandyq oqýshylar Beıjińdegi robototehnıka chempıonatynda kúmis júlde jeńip aldy.
