Beıjińdegi áskerı paradqa 26 eldiń basshylary qatysady

ASTANA.KAZINFORM - Qytaıda ótetin Ekinshi dúnıejúzilik soǵystyń aıaqtalǵanyna 80 jyl tolǵanyna oraı ótetin paradqa 20-dan astam sheteldik kóshbasshy qatysady, dep habarlaıdy Sınhýa.

Qonaqtar arasynda Qazaqstan prezıdenti Qasym-Jomart Toqaev, Belarýs, Ázerbaıjan, Iran, Qyrǵyzstan, Ózbekstan, Tájikstan, Túrkimenstan, Indonezııa, Reseı basshylary, Armenııa, Malaızııa, Pákistan, Slovakııa jáne basqa da elderdiń premer-mınıstrleri bar. Іs-sharaǵa Soltústik Koreıa basshysy Kım Chen Yn da qatysady.

Bul – Kım Chen Yn úshin alǵashqy halyqaralyq kezdesý.

Beısenbi kúngi baspasóz máslıhatynda Qytaı Syrtqy ister mınıstrliginiń ókili Soltústik Koreıaǵa burynnan kele jatqan «dástúrli dostyǵy» úshin alǵys aıtyp, eki el «aımaqtaǵy beıbitshilik pen turaqtylyq» úshin yntymaqtastyqty jalǵastyratynyn aıtty.

AQSh prezıdenti Donald Tramp is-sharaǵa qatyspaıdy, biraq osy aptanyń basynda ol Soltústik Koreıa basshysymen kezdesýge daıyn ekenin bildirdi.

31 tamyz ben 1 qyrkúıek aralyǵynda Qytaıdyń Tıantszın qalasynda 20-dan astam memleket basshylary, sondaı-aq 10 halyqaralyq uıym basshylary qatysatyn Shanhaı yntymaqtastyq uıymynyń sammıti ótedi.

Qyrkúıektiń 3-i kúni Beıjińdegi Tıananmen alańynda Ekinshi dúnıejúzilik soǵystyń aıaqtalýynyń 80 jyldyǵyn toılaýǵa arnalǵan áskerı parad ótedi, onda Qytaı óziniń sońǵy qarýlaryn, sonyń ishinde gıper dybysty zymyrandar men ushqyshsyz júıelerdi kórsetedi. Eldiń qarýly kúshteriniń jańa qurylymy alǵash ret tolyq kólemde kórsetiledi.

Buǵan deıin Qasym-Jomart Toqaevtyń Qytaı Halyq Respýblıkasyna baratynyn jazǵan bolatynbyz.