Búkilqytaılyq halyq ókilderi jınalysynyń sessııasy aıaqtaldy
BEIJІŃ. KAZINFORM – Búgin tústen keıin Beıjińdegi Halyq májilis zalynda QHR-daǵy jyldyń basty saıası oqıǵasy – 14-shi Búkilqytaılyq halyq ókilderi jınalysynyń 2-shi sessııasynyń resmı jabylý saltanaty ótti.
Sezd delegattary 2023 jylǵa arnalǵan ortalyq jáne jergilikti bıýdjetterdiń atqarylýy týraly esepterdi jáne 2024 jylǵa arnalǵan ortalyq jáne jergilikti bıýdjetterdiń jobalaryn, úkimettiń jumysy týraly, eldiń 2023 jylǵa arnalǵan áleýmettik-ekonomıkalyq damý jospary jáne 2024 jylǵa arnalǵan ekonomıkalyq damý josparynyń oryndalýy týraly, áleýmettik salanyń jobalaryn bekitý týraly qaýlylardy qabyldady.
Sonymen qatar, BHÓJ Turaqty komıtetiniń jumysy týraly baıandama bekitilip, Qytaıdyń Joǵarǵy halyq soty men Joǵarǵy halyq prokýratýrasynyń jumysy týraly baıandamalar maquldandy.
Sondaı-aq, depýtattar QHR Memlekettik keńesin uıymdastyrý týraly zańǵa túzetýler jobasyn qabyldaý úshin daýys berdi.
Bıyl Qytaı úkimeti basshysynyń parlament otyrysy aıaqtalǵannan keıingi dástúrli baspasóz máslıhaty ótkizilgen joq.
«Bıyl QHR Memlekettik keńesi premeriniń baspasóz máslıhaty ótkizilmeıdi. Erekshe jaǵdaılar týyndamasa, úkimet basshysynyń BHÓJ sessııasynan keıingi baspasóz máslıhaty aldaǵy birneshe jylda budan bylaı ótkizilmeıdi», - dedi 14-shi BHÓJ ekinshi sessııasynyń baspasóz hatshysy Loý Tsıntszıan.
BHÓJ aǵymdaǵy sessııasy bir aptaǵa sozylyp, 11 naýryzda aıaqtaldy.
