Beıjińde ShYU-ǵa múshe memleketter syrtqy ister mınıstrlikteriniń ókilderi bas qosty
ASTANA. KAZINFORM – Shanhaı yntymaqtastyq uıymynyń shtab-páterinde ShYU-ǵa múshe memleketter syrtqy ister mınıstrlikteriniń aqparattyq qyzmetteriniń jyl saıynǵy konsýltatsııalary ótti. Bul týraly QR Syrtqy ister mınıstrliginiń baspasóz qyzmeti habarlady.
Іs-sharaǵa Qazaqstan Respýblıkasy Syrtqy ister mınıstrliginiń Halyqaralyq aqparat komıtetiniń tóraǵasy Aıbek Smadııarov qatysty.
Konsýltatsııalar barysynda ShYU Hatshylyǵy ótken jyldaǵy aqparattyq jumystyń qorytyndylaryn usyndy. Qatysýshylar birlesken jobalardy júzege asyrý tájirıbesimen bólisip, resmı materıaldardy jarııalaýda ashyqtyq pen jedeldiktiń mańyzdylyǵyn atap ótti.
A.Smadııarov «kontent kelisimdiligi men negizgi habarlamalardyń sınhrondalýy Uıym ishindegi senimdi nyǵaıtýǵa jáne halyqaralyq arenada birtutas aqparattyq maıdan qurýǵa múmkindik beretinin» atap ótti. Sondaı-aq ol Qytaı tarapy men ShYU Hatshylyǵyna is-sharany joǵary deńgeıde uıymdastyrǵany jáne aqparattyq yntymaqtastyqty nyǵaıtýǵa baǵyttalǵan konstrýktıvti alań usynǵany úshin alǵys bildirdi.
Qytaı tarapy ShYU aıasyndaǵy qazirgi tóraǵalyǵy sheńberindegi medıajobalar sholýyn usynyp, Tıantszın qalasynda ótetin Uıymǵa múshe memleketter basshylary sammıtin aqparattyq súıemeldeý josparyn tanystyrdy. Talqylaýǵa qatysqan ShYU-ǵa múshe memleketterdiń syrtqy ister mınıstrlikteriniń beıindi qurylymdarynyń basshylary mýltımedııalyq translıatsııanyń jańa formattaryn engizý jáne Uıymnyń tsıfrlyq platformalardaǵy jumysyn kúsheıtý jóninde usynystar aıtty.
Qazaq dıplomaty ShYU-nyń aqparattyq kún tártibine jas jýrnalıster men blogerlerdi belsendi tartýdyń mańyzdylyǵyna nazar aýdaryp, bul aýdıtorııany keńeıtýge jáne Uıym qyzmetine jastardyń turaqty qyzyǵýshylyǵyn qalyptastyrýǵa septigin tıgizetinin jetkizdi.
Sonymen qatar aqparattyq ózara is-qımyldyń negizgi baǵyttary boıynsha pikir almasý ótti. Erekshe nazar «Shanhaı rýhy» qaǵıdattaryn birlesip qoldaýǵa, sondaı-aq óńir elderindegi jalǵan aqparatpen kúreske aýdaryldy.
Kezdesý sońynda qatysýshylar konsýltatsııalar hattamasyna qol qoıyp, mundaı formattaǵy kezdesýlerdiń syrtqy saıası mańyzdy oqıǵalardy jarııalaýǵa arnalǵan kelisilgen tásilderdi ázirleý men Uıymnyń biryńǵaı aqparattyq keńistigin odan ary nyǵaıtýdyń mańyzdylyǵyn talqylady.