Beıjińde Nurǵısa Tilendıevtiń mereıtoıyna arnalǵan mádenı kesh ótti
BEIJІŃ. KAZINFORM – Qytaı astanasy Beıjińde qazaqtyń kórnekti kompozıtory, dırıjer, Qazaqstannyń halyq ártisi Nurǵısa Tilendıevtiń 100 jyldyǵyna arnalǵan halyqaralyq mádenı kesh ótti.
Mereıtoılyq is-shara aıasynda qalanyń ortalyq kontsert zalynda «Álqıssa» atty shyǵarmashylyq baǵdarlama usynyldy. Kesh barysynda kompozıtordyń ómir joly men shyǵarmashylyǵyna arnalǵan mýzykalyq týyndylar oryndaldy.
Saltanatty keshke Almaty oblysynyń ákimi Marat Sultanǵazıev qatysyp, quttyqtaý sóz sóıledi. Óńir basshysy óz sózinde Qazaqstan men Qytaı arasyndaǵy mádenı yntymaqtastyqtyń mańyzdylyǵyna toqtaldy.
«Nurǵısa Tilendıev – qazaq rýhanııatynyń altyn dińgegi. Onyń shyǵarmalary – ulttyń tarıhı jady men mádenı kodyn beıneleıtin teńdessiz mura. Uly kompozıtordyń ǵasyrlyq mereıtoıynyń Beıjińde atalyp ótýi – qos halyq arasyndaǵy dostyq pen ózara qurmettiń jarqyn kórinisi», – dedi Marat Sultanǵazıev.
Resmı bólimnen keıin N.Tilendıev atyndaǵy «Otyrar sazy» folklorly-etnografııalyq orkestri sahnaǵa shyǵyp, kórermenge kompozıtordyń tańdaýly týyndylaryn usyndy. Orkestrge Qazaqstannyń eńbek sińirgen qaıratkeri, sazgerdiń qyzy Dinzýhra Tilendıeva dırıjerlik etti.
Kesh barysynda Qazaqstannyń halyq artısi Seken Turysbek, QR eńbek sińirgen qaıratkerleri Nurken Áshirov pen Madına Sádýaqasova, sondaı-aq Almaty oblysynyń óner ujymdary óner kórsetti. Sonymen qatar, shara aıasynda qazaqtyń dástúrli qolóneri men jeńil ónerkásip ónimderiniń kórmesi uıymdastyryldy.
Kontsertke qatysqan Beıjiń qalasynyń turǵyny Qalamqas Serikqyzy óz áserimen bólisti:
«Nurǵısa Tilendıevtiń áýenderi – júrekke jetetin shynaıy óner. Kúı men sazdan týǵan eldiń rýhyn sezindim. Qytaıda týyp-óssem de, qazaq bolyp týǵanyma erekshe maqtandym», – dedi ol.
Aıta keteıik, ıÝNESKO sheńberinde atalyp jatqan mereıtoı aıasynda Nurǵısa Tilendıevtiń shyǵarmashylyǵyn halyqaralyq deńgeıde nasıhattaýǵa arnalǵan mádenı sharalar jyl boıy jalǵasady. Bul bastamada Almaty oblysy belsendilik tanytyp otyr.
Aqerke Qabdulkákim