Beıjińde nóser jaýynǵa baılanysty qaýiptiń eń joǵary deńgeıi jarııalandy
ASTANA. KAZINFORM – Qytaı astanasy Beıjińniń birqatar aýdanynda qatty jaýyn-shashynǵa baılanysty qaýiptiń eń joǵary deńgeıi jarııalandy, dep habarlaıdy Kazinform agenttiginiń menshikti tilshisi.
10 jáne 11 shilde kúnderi qalada ekstremaldy jaýyn-shashyn kútiledi.
Mııýn, Hýaıjoý, Shýnı, Fanshan jáne Pıngý aýdandarynda eń joǵary – «qyzyl» qaýip deńgeıi engizildi. Sınoptıkterdiń boljamynsha, keı jerlerde nebári alty saǵat ishinde 150 mm-den astam jaýyn-shashyn túsýi múmkin, al táýliktik kórsetkish 200 mm-den asady.
Sý tasqynyna qarsy kúres jónindegi shtab qala turǵyndaryna arnaıy eskertý jasady. Sý basý qaýpiniń joǵary bolýyna baılanysty 9 shilde kúni saǵat 13:30-dan bastap Beıjińde tótenshe áreket etýdiń ekinshi deńgeıi engizildi.
– Turǵyndarǵa aýa raıy boljamyndaǵy ózgeristerdi, daýyldy eskertýlerdi jáne qaýipsizdik sharalary týraly resmı aqparatty muqııat baqylaýǵa keńes beriledi. Sondaı-aq turǵyndardan jolǵa shyǵýdy shekteý, qaýipti aımaqtardan aýlaq bolý jáne saqtyq sharalaryn saqtaý suralady, – delingen SMS-habarlamada.
Aıta keteıik, Qytaıda aıaq kıim fabrıkasyndaǵy órtten 28 adam qaza tapty.
