Beıjińde nóser jaýynǵa baılanysty 82 myńnan astam adam evakýatsııalandy
ASTANA. KAZINFORM — Dúısenbi kúni saǵat 21:00-degi jaǵdaı boıynsha Beıjiń qalasynyń ártúrli aýdandarynan 82 myńnan astam adam qaýipsiz jerge kóshirildi. Bul týraly qaladaǵy sý tasqynyna qarsy kúres shtaby habarlady, dep jazady Sınhýa.
Bılik organdary 201 týrıstik aımaqty, 3480 qonaqúı men 245 kempıng aımaǵyn ýaqytsha jabýǵa sheshim qabyldady. Sonymen qatar, qala boıynsha 3200-den astam qurylys alańynyń jumysy toqtatyldy.
Dúısenbi kúni kúndiz Beıjiń meteorologııalyq qyzmeti nóser jaýynnyń qaterine baılanysty eń joǵary – «qyzyl» deńgeıdegi eskertý jarııalady. Bul – Qytaıdaǵy tórt deńgeıli dabyl júıesiniń eń joǵarysy. Sınoptıkterdiń boljamynsha, kúshti jaýyn-shashyn 4 tamyz kúni tústen bastap 5 tamyz tańyna deıin Beıjińniń barlyq bóliginde baıqalýy múmkin.
Qalada sý tasqynyna qarsy eń joǵarǵy deńgeıdegi tótenshe áreket etý rejımi de engizildi.
Sonymen qatar, Beıjińniń meteorologııalyq qyzmeti men sý resýrstary basqarmasy birigip sý tasqyny qaýpine baılanysty eskertý jarııalady. Eń osal aýdandar retinde Mııýn aýdany ataldy, sondaı-aq Fanshan, Mentoýgoý jáne Hýaıjoý aýdandary da qaýip aımaǵynda.
Turǵyndarǵa naızaǵaı kezinde qaýipsiz jerge jasyryný, sý basqan joldarmen júrmeý jáne taýly nemese ózen mańyndaǵy aımaqtardan aýlaq bolý eskertildi.
Ótken aptada Beıjińdegi kúshti jaýyn saldarynan 44 adam qaza tapqan bolatyn. Tabıǵı apattan 300 myńnan astam adam zardap shekse, shamamen 24 myń turǵyn úı nysanyna zaqym keldi.
Dúısenbi kúni QHR Sý tasqyny men qurǵaqshylyqpen kúres jónindegi memlekettik shtaby Beıjiń, ortalyq baǵynystaǵy Tıantszın qalasy, Hebeı jáne Gýandýn provıntsııalaryndaǵy sý tasqynyna baılanysty tótenshe áreket etý deńgeıin úshinshi deńgeıge kóterdi (bul – Qytaıdyń tórt deńgeıli ulttyq júıesindegi úshinshi mańyzdylyq deńgeıi).
Boljamǵa sáıkes, atalǵan tórt óńirde 4 tamyz keshinen 5 tamyzǵa deıin nóser jaýyn jaýyp, keı jerlerde óte qatty jaýyn-shashyn bolady.
Habarlanǵandaı, qazirgi tańda Beıjiń men Hebeı, Gýandýn provıntsııalarynda sý tasqynyna qarsy sharalardy uıymdastyrýǵa kómek kórsetý úshin arnaıy jumys toptary jumysyn jalǵastyryp jatyr.
Osydan buryn Beıjiń nóser jańbyrǵa baılanysty eń joǵary dabyl deńgeıin jarııalaǵanyn jazǵan edik.