Beıjińde nóser jańbyr saldarynan 95 myńnan astam adam evakýatsııalandy
ASTANA. KAZINFORM — Beıjińde 36 279 úı sharýashylyǵynan 95 657 adam qaýipsiz jerge kóshirildi. Qatty nóserge baılanysty jergilikti bılik sý tasqynyna qarsy sharalardy kúsheıtip, shuǵyl evakýatsııa júrgizdi, dep habarlaıdy Sınhýa.
Juma kúni qalada taǵy bir nóser tolqyny boldy. Qalalyq sý tasqyny men qurǵaqshylyqqa qarsy shtab keńsesiniń málimetinshe, saǵat 08:00-den 17:00-ge deıin Beıjińde orta eseppen 12 mm jaýyn-shashyn tústi. Eń kóp jaýyn-shashyn qala mańyndaǵy Pıngý aýdanyndaǵy bazar aýmaǵynda tirkelip, munda 164 mm jańbyr jaýǵan.
Qaladaǵy iri jáne orta sý qoımalaryndaǵy sý deńgeıi tasqyn kezeńindegi ruqsat etilgen shekten tómen.
Sınoptıkter senbi kúni de ortasha jáne qatty jańbyr jaýady dep boljam jasap otyr.
Turǵyndarǵa ashyq aýadaǵy sharalardy shektep, aýa raıyna qatysty eskertýler men tótenshe habarlamalardy muqııat qadaǵalaý usynyldy.
Budan buryn QHR Qarjy mınıstrligi men QHR Tótenshe jaǵdaılardy basqarý mınıstrligi birlesip, tabıǵı apattardan zardap shekkenderge kómek kórsetý jónindegi ortalyq qordan Fýtszıan jáne Chjetszıan provıntsııalaryndaǵy apattyq-qutqarý jáne qalpyna keltirý jumystaryna qoldaý kórsetý úshin 40 mln ıýan (shamamen 5,88 mln AQSh dollary) bólgenin jazǵan edik.
Jalpy Qytaıda tasqyn men daýyldan 10 adam qaza taýyp, ondaǵan myń turǵyn zardap shekkeni belgili.
