Beıjińde Naýryz meıramy toılandy
ASTANA. KAZINFORM – 29 naýryzda Qytaı astanasynda Naýryz merekesine arnalǵan «NAURYZFEST» aýqymdy festıvali ótti, dep habarlaıdy Kazinform agenttiginiń Beıjińdegi tilshisi.
Festıvaldiń ózegi – qazaqtyń dástúrli kıiz úıi, kire berisinde qurmetti qaraýyl tizilgen, dástúrli saýyt kıgen jaýyngerler. Festıval baǵdarlamasy qaıyrymdylyq, gastronomııa jáne kontserttik baǵdarlamany biriktirdi.
Qazaqstan Respýblıkasynyń Qytaıdaǵy Elshiligi «Sandyq» ulttyq taǵamdar meıramhanasymen birlesip, qaıyrymdylyq jármeńkesin uıymdastyrdy. «Altyn dala» saýda úıi men QazTrade qazaqstandyq ónimderdiń kórmesin usyndy. Qonaqtar qazaq qolónershileriniń týyndylaryn da tamashalady.
Іs-sharany ashqan Qazaqstan Respýblıkasynyń Qytaı Halyq Respýblıkasyndaǵy Tótenshe jáne Ókiletti Elshisi Shahrat Nuryshev merekeniń meıirimdilikti umytpaýǵa, qaıyrymdylyqty baǵalaýǵa, tabıǵatpen úndestikte ómir súrýge shaqyratyn tereń fılosofııasyna toqtaldy.
«Halyqtyń túsiniginde naǵyz kóktemniń sımvoly bolǵan dala qyzǵaldaǵy Uly dalanyń «Naýryz meıramynyń» basty sımvolyna aınaldy. Beıjińdegi Naýryz meıramynyń Qazaqstan-Qytaı mádenıeti jyly aıasynda ótip jatqanynyń sımvoldyq máni bar», - dedi ol.
Festıvaldiń erekshe sáti Qazaqstannyń dıplomatııalyq mıssııasynyń basshysy úsh jas otandasymyzdyń bolashaqqa degen senimdi qadamyn beıneleıtin «Tusaýkeser» rásimi boldy.
Jas bı ujymdary men «Qazaq kontsert» memlekettik akademııalyq kontserttik uıymynyń ónerpazdary merekelik kóńil-kúı syılady. «Astana sazy» memlekettik folklorlyq ansambli, «Gúlder» balet ujymy jáne basqa da ónerpazdar óz ónerlerimen kórermenderdi tánti etti. Belsendi demalys áýesqoılary «asyq atý», «arhan tartý» jáne «toǵyzqomalaq» ulttyq oıyndarynan saıysqa tústi.
Festıvalge Qytaıdyń memlekettik organdarynyń ókilderi, sheteldik elshiler, Qytaıda turatyn Qazaqstan azamattary, sondaı-aq elorda turǵyndary men qonaqtary qatysty. Sharany Qazaqstan Elshiligi Beıjińdegi Qazaqstan mádenı ortalyǵymen birlesip, QR Mádenıet jáne aqparat mınıstrliginiń qoldaýymen uıymdastyrdy.
Buǵan deıin Máskeýde Naýryz meıramy toılanǵanyn jazǵan edik.