Beıjińde kespehana aspazy men daıashylaryn tolyqtaı robot almastyrdy
ASTANA. KAZINFORM — Beıjińniń Fentaı aýdanynda synaq rejıminde el astanasyndaǵy tuńǵysh tolyqtaı avtomattandyrylǵan kespehana jumysyn bastady, dep habarlaıdy Kazinform agenttiginiń Beıjińdegi menshikti tilshisi China Daily-ge silteme jasaı otyryp.
Aýdany 400 sharshy metrlik ǵımaratta robottar shamamen úsh mınýtta kespe daıyndap, ony pisken boıda ákelip beredi. Mashınalar qamyr ılep, ony kesedi jáne qaınata alady, sonymen qosa túrli tuzdyqtar qosyp, daıyn asty týra ústel basyna ákeledi. Qyzmetkerler bolsa, tek ıngredıentter qoryn tolyqtyryp, tehnıkanyń jumysyn qadaǵalaıdy jáne ydystardy jınaıdy.
Integratsııalanǵan júıeni Beıjińdegi Beijing Yuli Technology Co kompanııasy jasap shyqty. Buǵan deıingi pılottyq jobalarda robottar tek keıbir áreketterdi ǵana oryndaıtyn, al bul jobada tamaq ázirleý jáne usyný bastan-aıaq atqarylady.
— Buryn mundaı tehnologııalar tek jekelegen áreketterdi oryndaǵan nemese tanystyrylym úshin qoldanylatyn. Bizdiń mindetimiz — osy qyzmet túrin kún saıyn kommertsııalyq maqsatta paıdalaný úshin barlyq kezeńdi biryńǵaı júıege biriktirý, — deıdi kompanııa bas dırektorynyń orynbasary ıAn Haıbın.
Kompanııa atalǵan meıramhana tehnologııanyń synaq alańy retinde qyzmet etip jatqanyn, bári sátti ótse, ol jappaı óndiriske jiberiletinin málimdedi.
Meıramhana tolyǵymen tamyz aıynyń aıaǵynda ashylady dep josparlanyp otyr.
Joba Beıjińniń robototehnıkany masshtabtaý jónindegi (2025–2027 jj.) úsh jyldyq jospary aıasynda bastaý aldy. Osy baǵdarlama boıynsha jazda qalada tazalaý jáne patrýldeýge arnalǵan 72 robot iske qosyldy, sonymen qatar aýrýhanalardyń birinde dárihana jumysy avtomattandyryldy.
Buǵan deıin gýmanoıdty robottardyń ekinshi Dúnıejúzilik oıyndary Beıjińde ótetini habarlanǵan bolatyn.
Raıhan Rahmetova
