Beıjińde qazaqtyń ulttyq qundylyqtary tanystyryldy
BEIJІŃ. KAZINFORM – Beıjiń qalasynda Qytaıdaǵy Qazaqstan týrızm jylynyń resmı ashylýyna oraı qazaqtyń ulttyq qudylyqtary men ár oblystyń týrıstik múmkindikteri tanystyryldy.
Atap aıtsaq, Beıjińde Qazaqstannyń ár óńirinen kelgen delagatsııa músheleri qazaqtyń qurty men irimshigin, qazy-qarta, jal-jaıasyn, baýyrsaq pen elimizdiń taza balyn, tipti, Naýryz kójesine deıin daıyndap ala barǵan.
Sonymen qatar ulttyq qolóner buıymdaryn da qonaqtar aldyna jaıyp salyp, ulttyq mýzkalyq asaptarymyzben ánderin áýeletip, kúılerin quıqyljyta tartyp, qytaılyq azamattardy ónerimen tańǵaldyryp jatyr.
Іs-sharanyń negizgi maqsaty – qazaqtyń mádenıeti men salt-dástúrin beıjińdik turǵyndarǵa tanystyrý.
Esterińizge sala keteıik, erteń, 29 naýryzda qonaqtardy Qytaıdaǵy Qazaqstan týrızmi jylynyń resmı ashylý saltanaty, mádenı baǵdarlamasy bar etnoaýyl, sondaı-aq kórnekti ártisterdiń qatysýymen ótetin úlken gala-kontsert kútip tur.
Aıta keteıik, osyǵan deıin Beıjiń qalasynda Qytaıdaǵy Qazaqstannyń týrızm jyly resmı túrde bastalǵanyn jazǵan bolatynbyz.
Sondaı-aq Beıjińdegi qazaq stýdenteri atalmysh is-sharaǵa kelgen UFC uıymynda óner kórsetetin tanymal qazaqstandyq faıter Shavkat Rahmonovpen qonaqúıdiń kireberisinde estelik sýretke túsip, qoltańba alǵan bolatyn.
