Beıjińde Qazaqstannyń sý jónindegi bastamalary talqylandy
ASTANA.KAZINFORM - Búgin Qazaqstannyń Beıjińdegi mádenı ortalyǵynda Qazaqstan men Qytaıdyń jetekshi sarapshylarynyń qatysýymen «Sý: turaqty damý jáne sý bastamalary» taqyrybynda dóńgelek ústel ótti.
Alǵashqy sózdi bastaǵan Qazaqstannyń Qytaıdaǵy elshisi Shahrat Nuryshev halyqaralyq qaýymdastyqtyń birlese kúsh jumsaýyn qajet etetin sý problemalarynyń jahandyq sıpatyn jáne munyń Qazaqstan úshin erekshe mańyzyn atap ótti.
- Osy jaǵdaıda Qazaqstan Prezıdenti Qasym-Jomart Toqaevtyń Qazaqstanda ShYU sý taldaý ortalyǵyn jáne BUU qamqorlyǵymen Halyqaralyq sý uıymyn qurý jónindegi bastamalary sý problemalaryna jaýap retinde birlesken sheshimder ázirleýge yqpal etýge baǵyttalǵany erekshe mańyzdy, - dep atap ótti ol.
Qazaq dıplomatynyń aıtýynsha, Qazaqstan men Qytaıdyń sý salasyndaǵy yntymaqtastyq tájirıbesi eki elge strategııalyq seriktestiktiń kelesi kezeńine ótýge múmkindik beredi.
- Qazaqstan men Qytaıdyń ózara senim men tatý kórshilik qatynasyna negizdelgen, zamanaýı ǵylym men tehnıkanyń sońǵy jetistikterin paıdalana otyryp, sý yntymaqtastyǵynyń jańa modelin birlesip ázirleýge úlken múmkindik bar, - dep qorytyndylady Shahrat Nuryshev.
Qazaqstandyq dıplomattar Qazaqstannyń halyqaralyq bastamalaryn egjeı-tegjeıli túsindirdi. Syrtqy ister mınıstrliginiń departament dırektory Dıdar Temenov BUU janyndaǵy Sý uıymyn qurý jobasyn usyndy. Al ShYU janyndaǵy turaqty ókil Raqymjan Rahymov ShYU-ǵa múshe memleketterdiń sý problemalaryn taldaý ortalyǵyn qurý tujyrymdamasyn baıandady.
Sý resýrstarynyń aqparattyq-taldaý ortalyǵynyń ókili Danııar Saǵadıev sý resýrstaryn birlesip paıdalaný jáne turaqty damý úshin yntymaqtastyqty damytý máselesin qozǵady.
Geografııa jáne sý qaýipsizdigi ınstıtýtynyń ókili Saıat Álimqulov óz baıandamasyn Qazaqstan men Qytaıdyń transshekaralyq ózender boıynsha ózara árekettesýine arnady. Al Qazaq sý resýrstaryn zertteý ınstıtýtynyń ókili Serik Saırov klımattyń ózgerýi jaǵdaıyndaǵy sý resýrstaryna nazar aýdardy.
Óz kezeginde qytaılyq sarapshylar óz elderiniń sý únemdeý tehnologııalaryndaǵy tájirıbesimen tanystyrdy jáne halyqaralyq yntymaqtastyqty keńeıtýge daıyn ekenin bildirdi.
- Biz sý únemdeıtin sýarý, tsıfrlandyrý, qaıta óńdelgen sýdy paıdalaný jáne qurǵaqshylyqty baqylaý salalarynda Qazaqstandy qosa alǵanda, halyqaralyq seriktestermen praktıkalyq yntymaqtastyqty asyǵa kútemiz, - dep atap ótti Qytaı sý resýrstary jáne gıdroenergetıka akademııasy Sý resýrstary ınstıtýtynyń dırektorynyń orynbasary He Fan.
Aıta keteıik, Soltústik Aralǵa bir jylǵa jetpeı 1,2 mlrd tekshe metr sý jiberildi.
