Beıjińde Qazaqstan Prezıdentiniń Joldaýy talqylandy
ASTANA. KAZINFORM — Búgin Beıjińdegi Qazaqstannyń mádenı ortalyǵynda Memleket basshysynyń Joldaýy men Qazaqstannyń halyqaralyq bastamalaryna arnalǵan dóńgelek ústel ótti. Oǵan Qytaıdyń jetekshi ǵylymı-zertteý jáne saraptamalyq ortalyqtarynyń ókilderi qatysty.
Jıynda Qazaqstannyń Qytaıdaǵy elshisi Shahrat Nuryshev sóz sóılep, qytaılyq sarapshylarǵa strategııalyq qujattyń negizgi baǵyttaryn jan-jaqty tanystyrdy. Ol áleýmettik-ekonomıkalyq damýdyń basym baǵyttaryna, tsıfrlyq transformatsııaǵa, jasandy ıntellektini engizýge, ınfraqurylymdy jańǵyrtýǵa jáne eldiń ınvestıtsııalyq áleýetin odan ári nyǵaıtýǵa erekshe toqtaldy.
Sondaı-aq ol óńirlik turaqtylyqty nyǵaıtý, kópjaqty yntymaqtastyqty keńeıtý jáne ornyqty damý qaǵıdattaryn ilgeriletý jónindegi Qazaqstannyń halyqaralyq bastamalaryn, eki el arasyndaǵy yntymaqtastyqty odan ári damytý múmkindikterin atap ótti.
Dóńgelek ústel barysynda Qytaı qoǵamdyq ǵylymdar akademııasynyń, QHR Memlekettik keńesi janyndaǵy Damý máselelerin zertteý ortalyǵynyń, Qazirgi zamanǵy halyqaralyq qatynastar akademııasynyń, Shyǵys Qytaı pedagogıkalyq ýnıversıtetiniń, Soltústik-Batys ýnıversıtetiniń jáne Lanchjoý ýnıversıtetiniń ókilderi óz baıandamalaryn usyndy.
Qytaıdyń Qazirgi zamanǵy halyqaralyq qatynastar akademııasy Akademııalyq komıteti hatshysynyń orynbasary Dın Sıaosın bıylǵy Joldaýda jarııalanǵan «Halyqtyq qurylys» urany Qazaqstan ekonomıkasyn damytýdyń jańa kezeńine baǵyt siltegenin aıtty.
— Prezıdent Qasym-Jomart Toqaev usynǵan «Halyqtyq qurylys» tujyrymdamasy ınfraqurylymdy aýqymdy damytýǵa, osy ýaqytqa deıin qalyptasqan áleýetti tıimdi paıdalanýǵa jáne Qazaqstannyń damýynyń kelesi kezeńine berik negiz qalaýǵa baǵyttalǵan, — dedi ol.
Onyń sózinshe, Qytaı kásiporyndary Qazaqstandaǵy ınfraqurylym nysandaryn salýǵa, sonyń ishinde temirjoldar men avtomobıl joldaryn, áýejaılar men aýrýhanalardy turǵyzýǵa atsalysa alady. Atom, jylý, jel jáne kún elektr stantsııalary salasynda eki el arasynda yntymaqtastyq tájirıbesi qalyptasqan. Bul baǵyttaǵy jańa jobalar da qolǵa alynǵan.
— Qoryta aıtqanda, «Halyqtyq qurylys» jobalary Qazaqstan ekonomıkasynyń damýyna yqpal etip, Qazaqstan men Qytaı arasyndaǵy yntymaqtastyqty jańa deńgeıge kóteredi, — dep túıindedi ol.
Qytaı qoǵamdyq ǵylymdar akademııasynyń Reseı, Shyǵys Eýropa jáne Ortalyq Azııa ınstıtýtynyń sarapshysy Sıao Bın Qazaqstannyń kólik-logıstıkalyq áleýetine erekshe nazar aýdardy.
— Prezıdent Qazaqstan halqyna Joldaýynda logıstıkalyq ınfraqurylymdy damytýǵa erekshe mán berdi. Osy turǵydan alǵanda, «Orta dálizdiń» keleshegi zor. Óıtkeni soltústik baǵyttaǵy júk tasymalynyń kólemi artyp keledi, al ońtústik baǵyt áli de jobalaý kezeńinde, — dedi ol.
Sarapshynyń pikirinshe, Qazaqstan arqyly ótetin qurlyq baǵytynyń taǵy bir artyqshylyǵy — klımattyń ózgerýine baılanysty teńiz tasymalynda jıilegen kedergilerge táýeldi bolmaýy.
Dóńgelek ústeldiń qorytyndy bóliminde qatysýshylar Qazaqstandaǵy reformalardy eskere otyryp, ekijaqty yntymaqtastyqty damytýdyń jańa múmkindikterin talqylady. Sondaı-aq eki el arasyndaǵy ǵylymı jáne sarapshylyq baılanystardy odan ári nyǵaıtýdyń mańyzyn atap ótti.
Buǵan deıin Prezıdent Joldaýy Qazaqstannyń jańa damý modelin aıqyndaıtyny týraly Shanhaı qoǵamdyq ǵylymdar akademııasy ShYU zertteý ortalyǵynyń dırektory Lı Lıfannyń pikirin jarııalaǵan edik.
