Beıjińde Qazaqstan men Qytaı arasyndaǵy ekijaqty saýda máselesi talqylandy
BEIJІŃ. KAZINFORM – Qazaqstannyń Qytaıdaǵy Elshisi Shahrat Nuryshev QHR Kommertsııa mınıstrliginiń Syrtqy saýdany damytý bıýrosynyń dırektory Lıý Dıansıýnmen kezdesý ótkizdi.
Taraptar Qazaqstan men Qytaıdyń saýda-ekonomıkalyq saladaǵy ózara is-qımylynyń ózekti máselelerin talqylady, sondaı-aq ózara saýdany damytý salasyndaǵy almasýlardy tereńdetý jónindegi josparlardy belgiledi.
«Qytaılyq tarap QHR-dyń syrtqy saýdany yntalandyrý jónindegi saıasatynyń aǵymdaǵy ahýaly men damý perspektıvalary týraly, sondaı-aq saýda-ekonomıkalyq almasýlardy tereńdetýge baǵyttalǵan birqatar kópjaqty is-sharalardy ótkizý josparlary týraly habarlady. Lıý Dıansıýn qytaılyq taraptyń 2024 jylǵy 23-25 tamyzda Astanada ótetin Qazaqstandaǵy Qytaı taýarlarynyń 19-shy kórmesine daıyndyq barysy týraly habarlap, kórme sheńberinde joǵary eksporttyq áleýeti bar qazaqstandyq ónimder úshin kórme aımaǵyn ornalastyrý boıynsha júrgizilip jatqan jumystar týraly atap ótti. Qytaılyq taraptyń QR jáne QHR aýmaqtarynda birlesken is-sharalardy birge ótkizýge daıyn ekendigin jetkizdi», — delingen habarlamada.
Óz kezeginde Sh. Nuryshev suhbattasty QHR-men saýdany ilgeriletý boıynsha QR Úkimeti qabyldaǵan sharalarmen tanystyrdy, sondaı-aq saýda qyzmetin yntalandyrý úshin birlesken is-sharalardy ótkizýdi quptady. Ol sońǵy jyldary QR men QHR arasyndaǵy ózara saýdanyń serpindi damýyn, onyń ishinde 2023 jylǵy qorytyndysy boıynsha ózara saýdanyń rekordtyq 41 mlrd dollarǵa jetýin habarlady. Qazaqstan Elshisi qytaılyq taraptyń aǵymdaǵy ekijaqty saýdanyń ósý qarqynyn saqtaý úshin qolaıly jaǵdaılar jasaý qajettigine nazaryn aýdardy, sondaı-aq eki eldiń bıznes-toptary arasynda baılanys ornatýǵa jáne taýar aınalymy kólemin arttyrýdy yntalandyrýǵa, QR men QHR arasyndaǵy taýar pozıtsııalarynyń sanattaryn ulǵaıtýǵa baǵyttalǵan birlesken kórmeler men konferentsııalar ótkizýdiń mańyzdylyǵyn atap ótti.
Kezdesý qorytyndysy boıynsha Lıý Dıansıýn qazaqstandyq tarapty 2024 jylǵy 25 qyrkúıekte Chjetszıan ólkesiniń Hanchjoý qalasynda ótetin «3-shi Jahandyq tsıfrlyq saýda kórmesine» qatysýǵa shaqyrdy. Ol atalǵan is-shara taraptardyń elektrondyq saýda salasyndaǵy yntymaqtastyǵyn nyǵaıtýǵa múmkindik beretinine senim bildirdi.
2003 j. qurylǵan Syrtqy saýdany damytý bıýrosy QHR Kommertsııa mınıstrligine tikeleı baǵynady. Bıýro ulttyq syrtqy saýda jáne ekonomıkalyq saıasatty iske asyrýmen, syrtqy saýdany damytýǵa baılanysty memlekettik qyzmetterdi usynýmen, Qytaıda da jáne shetelde de iri saýda-ekonomıkalyq almasýlar men kórmelerdi uıymdastyrý arqyly sheteldik kásiporyndarmen yntymaqtastyqqa járdemdesýmen, sondaı-aq bıznes-oqytýdy jáne ımport pen eksportty ilgeriletý jónindegi mamandandyrylǵan jumysty damytýmen aınalysady.
Qazaqstandaǵy qytaı taýarlarynyń 19-shy kórmesi 2024 j. 23-25 tamyz aralyǵynda EXPO Center Astana-da ótedi. Bıyl kórme kólemi 6 myń sharshy metrdi quraıdy.
