Beıjińde Qazaqstan-Qytaı Іskerlik keńesiniń 8-shi otyrysy ótedi

ASTANA. KAZINFORM – 2 qyrkúıekte Beıjińde ótetin Qazaqstan-Qytaı Іskerlik keńesiniń (QQІK) otyrysynda eki eldiń iri bıznes ókilderi bas qosady. 

«Samuryq-Qazyna» AQ málimetine sáıkes, aldaǵy is-sharanyń kún tártibine energetıkalyq yntymaqtastyqty damytý jáne turaqty «jasyl» ósimdi ilgeriletý, logıstıkalyq jáne óndiristik tizbekterdi keńeıtý kiredi.

– Qytaılyq isker toptardyń qyzyǵýshylyǵyn eskere otyryp, kezdesý tájirıbe almasý, jańa iskerlik baılanystardy ornatý jáne burynǵysyn nyǵaıtý, sondaı-aq ekonomıkanyń negizgi salalaryndaǵy yntymaqtastyqty damytý úshin mańyzdy alańǵa aınalady, - delingen habarlamada.

«Samuryq-Qazyna» AQ-nyń Qytaıdaǵy ókildiginiń aqparatyna sáıkes, QQІK 8-shi otyrysyna Qazaqstan men Qytaıdan 500-den astam memlekettik organdar men bıznes qurylymdarynyń ókilderi, onyń ishinde 70-ten astam iri qytaılyq korporatsııalar qatysady dep josparlanyp otyr.

Eske sala ketsek, 2024 jyldyń shildesinde Astanada ótken Qazaqstan-Qytaı Іskerlik keńesiniń 7-shi otyrysynyń qorytyndysy boıynsha 3,7 mlrd dollardan asatyn somaǵa 40-tan astam qujatqa qol qoıylǵan bolatyn.

Qazaqstan-Qytaı iskerlik keńesi 2013 jyly qurylǵan.