Beıjińde Qazaqstan-Qytaı yntymaqtastyǵynyń keleshegi talqylandy
Qazaqstan Respýblıkasynyń QHR-daǵy Elshiliginde «Qazaqstan reformalary jáne Qazaqstan-Qytaı yntymaqtastyǵynyń keleshegi» taqyrybynda dóńgelek ústel ótti, dep habarlaıdy Kazinform agenttigi.
Qazaqstan Respýblıkasynyń QHR-daǵy Elshisi Shahrat Nuryshev óz sózinde Qazaqstannyń ónerkásip sektoryn, tranzıttik-kóliktik sektoryn, aýyl sharýashylyǵyn, energetıka men sý sharýashylyǵyn damytýǵa qatysty jańa ekonomıkalyq baǵyttyń negizgi erejelerin atap ótti. Sondaı-aq ol «dóńgelek ústel» qatysýshylaryn eldiń áleýmettik-ekonomıkalyq damýymen tanystyrdy.
Sh.Nuryshev 2023 jylǵy Qazaqstan-Qytaı yntymaqtastyǵynyń qorytyndysyn shyǵara otyryp, Qytaı Qazaqstannyń iri syrtqy saýda jáne ınvestıtsııalyq seriktesteriniń biri bolyp qala beretinin atap ótti. Bıylǵy jyly Qazaqstan men Qytaı arasyndaǵy taýar aınalymynyń ulǵaıýy jáne júk tasymaly kóleminiń artýy baıqaldy.
Ol ekijaqty mádenı-gýmanıtarlyq baılanystardy odan ári damytýdyń keń keleshegi bar ekenin aıtty. 2024 jyl Qytaıda Qazaqstannyń týrızm jyly bolyp jarııalandy.
«Kelesi jyly biz elimizdiń baı týrıstik áleýetin tanystyrý maqsatynda 20-dan astam túrli is-shara ótkizýdi josparlap otyrmyz», - dep atap ótti Elshi.
Dóńgelek ústel barysynda qatysýshylar elimizdiń jańa ekonomıkalyq saıasatynyń nátıjelerin talqylap, sondaı-aq Qazaqstan-Qytaı yntymaqtastyǵynyń keń perspektıvalaryn atap ótti.
Іs-sharaǵa QHR Memlekettik keńesi Damý ortalyǵynyń Eýropa men Azııanyń áleýmettik damý ınstıtýtynyń, Qytaı halyqaralyq máseleler akademııasy Eýrazııa ınstıtýtynyń, Qytaı qoǵamdyq ǵylym akademısynyń Shyǵys Eýropa jáne Ortalyq Azııa elderiniń Ortalyq Azııa bólimshesiniń, sondaı-aq Qytaıdyń qoǵamdyq jáne bilim berý qurylymdarynyń ókilderi qatysty.
