Beıjińde Qazaqstan kınosynyń aptalyǵy ótip jatyr
Beıjińdegi qazaqstandyq kıno aptalyǵyn «Patrıottar ýaqyty» kórkem fılmi ashty, dep habarlaıdy Kazinform agenttiginiń tilshisi.
Kórsetilim 2-5 qarasha aralyǵynda ótedi, osy kúnderi Qytaı kıno arhıvi janyndaǵy kınoteatr ekrandarynda alty fılm: «Tomırıs», «Birjan sal», «Shal», «Obýchenıe Ademokı», «Kompozıtor», «Patrıottar ýaqyty» jáne bir «Muzbalaq» mýltfılmi kórsetiledi.
Quttyqtaý sózinde Qazaqstan Respýblıkasynyń QHR-daǵy Elshisi Shahrat Nuryshev qazaqstandyq kıno aptalyǵynyń ashylýy Qazaqstan Respýblıkasynyń Shanhaı Yntymaqtastyq Uıymyna (ShYU) tóraǵalyǵy aıasynda ótip jatqanyn aıtty.
Sh.Nuryshevtiń aıtýynsha, Qazaqstan Respýblıkasynyń QHR-daǵy Elshiliginiń, ShYU Hatshylyǵynyń jáne ShYU Tatý kórshilik, dostyq jáne yntymaqtastyq komıtetiniń Qazaqstannyń 2023-2024 jyldary Uıymǵa tóraǵalyq etý kezeńine arnalǵan birlesken is-sharalar josparyna sáıkes ShYU-nyń odan ári damýyna jańa serpin qosqan barlyǵy 25 is-shara ótkizildi.
Aǵymdaǵy jyldyń qyrkúıek aıynda Beıjińdegi ShYU shtab-páterinde Qazaqstannyń mádenıet kúni sátti ótti.
«Búgin biz taǵy bir mańyzdy shara - qazaqstandyq kıno aptalyǵynyń ashylýyn ótkizip otyrmyz», - dep atap ótti ol.
Aptalyqtyń ashylýynda sóz sóılegen ShYU Bas hatshysy Chjan Mınniń habarlaýynsha, bıylǵy jyldyń shilde aıynda Qazaqstan Shanhaı yntymaqtastyq uıymyna tóraǵalyq etýdi qolǵa alǵanyn aıtty. Ol búgingi shara Qazaqstannyń ShYU-ǵa tóraǵalyq etý kezeńindegi eń jarqyn mádenı oqıǵalardyń biri ekenin atap ótti.
«Uıymnyń damýymen ShYU kınofestıvalderin ótkizý mádenı almasý aıasynda dástúrge aınaldy. Bul is-sharalar mádenıet salasyndaǵy yntymaqtastyqty tereńdetý úshin tıimdi alańdarǵa aınala otyryp, múshe memleketter tarapynan keń qoldaýǵa ıe bolýda. Olar sondaı-aq elderimizdiń kınematografııalary arasyndaǵy ózara túsinistik pen ózara tıimdi yntymaqtastyqty nyǵaıtýǵa jáne ShYU-nyń mádenı kún tártibin baıytýǵa mańyzdy úles qosyp otyr», - dedi Bas hatshy.
Beıjińdegi otandyq kınony Qazaqstannyń mádenıet qaıratkerleri jeke tanystyrady.
Sh.Aımanov atyndaǵy «Qazaqfılm» kınostýdııasynyń prezıdenti Azamat Satybaldynyń aıtýynsha, qazaqstandyq kıno aptalyǵy aıasynda qytaılyq kórermen nazaryna rejısser Doshan Joljaqsynovtyń «Birjan sal», rejısseri Ermek Tursynovtyń «Shal», rejısser Ádilhan Erjanovtyń «Obýchenıe Ademokı», rejısser Aqan Sataevtyń «Tomırıs», Turdybek Maıdan men Tilek Tóleýǵazynyń «Muzbalaq», rejısser Serikbol Ótepbergenniń «Patrıottar zamany» týyndylary usynylady.
Qazaq kınosy aptalyǵy aıasynda «T.Júrgenov atyndaǵy Qazaq ulttyq óner akademııasy men Qytaı kommýnıkatsııa ýnıversıteti arasyndaǵy yntymaqtastyq týraly memorandýmǵa» jáne «Qazaqfılm» AQ men Qytaı medıakorporatsııalarynyń biri arasynda «Fılmder men anımatsııalardy birlesip túsirý týraly nıet týraly memorandýmǵa» qol qoıyldy.
Qazaqstandyq fılmder kórsetilimin Qytaıdyń basqa qalalarynda da uıymdastyrý josparlanyp otyr.
Sharanyń ashylý saltanatyna QHR Mádenıet jáne týrızm mınıstrligi, QHR Syrtqy ister mınıstrligi, QHR Kınematografııa isteri jónindegi meılekettik basqarma ókilderi, Shanhaı yntymaqtastyq uıymynyń Bas hatshysy, ShYU-ǵa múshe memleketterdiń Elshileri, baıqaýshylar men dıalog boıynsha seriktester, sondaı-aq Beıjińde tirkelgen dıplomatııalyq korpýs ókilderi qatysty.
