Beıjińde Irannyń ıadrolyq máselesi boıynsha úshjaqty kezdesý bastaldy

BEIJІŃ. KAZINFORM — Beıjińde juma kúni Qytaı, Iran jáne Reseı Syrtqy ister mınıstrlikteri ókilderiniń kezdesýi bastaldy. Taraptar Irannyń ıadrolyq máselesin talqylaıdy.

Qytaı Ortalyq telearnasynyń habarlaýynsha, úshjaqty kezdesý Qytaı Syrtqy ister mınıstriniń orynbasary Ma Chjaosıýıdiń tóraǵalyǵymen ótip jatyr.

Sharaǵa Iran tarapynan Syrtqy ister mınıstriniń orynbasary Kazem Garıbabadı, Reseı tarapynan Syrtqy ister mınıstriniń orynbasary Sergeı Rıabkov qatysyp otyr. 

QHR SІM baspasóz hatshysy Mao Nınniń buǵan deıin málimdeýinshe, Qytaı, Reseı jáne Irannyń Beıjińde Irannyń ıadrolyq máselesi boıynsha kezdesýi Qytaıdyń baılanys pen úılestirýdi nyǵaıtýǵa, sondaı-aq dıalog pen kelissózderdi múmkindiginshe tezirek qaıta bastaý úshin jaǵdaı jasaýǵa baǵyttalǵan kezekti dıplomatııalyq qadamy bolmaq.

Onyń aıtýynsha, Qytaı BUU Qaýipsizdik keńesiniń turaqty múshesi jáne Irannyń ıadrolyq baǵdarlamasy boıynsha birlesken jan-jaqty áreket josparynyń qatysýshysy retinde Irannyń ıadrolyq máselesin saıası jáne dıplomatııalyq joldar arqyly durys retteýge, sondaı-aq halyqaralyq ıadrolyq qarýdy taratpaý rejımin qorǵaýǵa jáne Orta Shyǵysta beıbitshilik pen turaqtylyqty nyǵaıtýǵa kúsh salýǵa shaqyrady.

— Qazirgi jaǵdaıda biz tıisti taraptar sabyr saqtap, ustamdylyq tanytyp, Irannyń ıadrolyq máselesi tóńiregindegi jaǵdaıdyń shıelenisýine jol bermeý kerek dep sanaımyz, bul teketires pen qaqtyǵysqa aınalmaýy kerek, — dep keltirdi Xinhua qytaılyq dıplomattyń sózin.

2015 jyly Irannyń ıadrolyq máselesi boıynsha Birlesken jan-jaqty is-qımyl josparyna qol qoıyldy, oǵan sáıkes Tegeran halyqaralyq qaýymdastyqtyń sanktsııalaryn alyp tastaýy úshin óziniń ıadrolyq baǵdarlamasyn shekteýge mindetteme aldy. Alaıda 2018 jyly AQSh úkimeti Irannyń ıadrolyq kelisiminen birjaqty túrde shyǵyp, Iranǵa qarsy birqatar sanktsııany qalpyna keltirip, keńeıtti.

Buǵan deıin Qytaı, Iran jáne Reseı SІM ókilderi Beıjińde Irannyń ıadrolyq máselesin talqylaıtyny habarlanǵan edi.