Beıjińde Abaıdyń shyǵarmashylyǵyna arnalǵan jıyn ótti
ASTANA. KAZINFORM — Qytaı astanasy Beıjińdegi Qazaqstannyń mádenı ortalyǵynda Abaı kúnine oraı «Abaı – uly tulǵa» atty dóńgelek ústel ótti, dep habarlaıdy Mádenıet jáne aqparat mınıstrliginiń baspasóz qyzmeti.
Qazaqstan men Qytaıdyń ókilderi uly aqynnyń shyǵarmashylyq jáne zııatkerlik murasynyń mán-mańyzy, onyń qazirgi mádenıetke yqpaly jáne qazaq-qytaı gýmanıtarlyq baılanystaryn damytý máselelerin talqylady.
Іs-sharany Beıjińdegi Qazaqstannyń mádenı ortalyǵy Qazaqstan Respýblıkasynyń Qytaı Halyq Respýblıkasyndaǵy elshiligi jáne «Tszıntaı» mýzeıimen birlesip uıymdastyrdy.
Jıynǵa eki eldiń dıplomattary, ǵalymdary, jazýshylary, aýdarmashylary men mádenıet qaıratkerleri qatysty.
Kezdesý aıasynda Beıjińdegi Abaı Qunanbaıulynyń eskertkishine gúl shoqtaryn qoıý rásimi ótti. Dóńgelek ústelde Abaıdyń fılosofııalyq oılary, adamnyń adamgershilik jáne zııatkerlik turǵydan jetilýi týraly kózqarastary, «Tolyq adam» ilimi men shyǵarmalarynda kórinis tapqan jalpyadamzattyq qundylyqtar sóz boldy. Sonymen qatar qatysýshylar Abaı men Konfýtsıı murasynyń úndestigin aıryqsha atady.
Jıynda Abaı murasyn Qytaıda keńinen tanytý máselesi de qamtyldy. Aqyn shyǵarmalaryn qytaılyq zertteýshiler men qalamgerler zerdelep, qytaı tiline aýdaryp keledi. Al Beıjińde jyl saıyn dástúrli túrde ótetin «Abaı oqýlary» eki el arasyndaǵy mádenı baılanysty nyǵaıtady. Bıyl atalmysh is-shara halyqaralyq dóńgelek ústelmen jalǵasty.
Osyǵan deıin Almatyda Abaı kúnine oraı «Alǵashqy kitap» derekti fılminiń premerasy ótkenin jazdyq.
