Beıjiń til jáne mádenıet ýnıversıtetiniń prezıdenti ІІ dárejeli «Dostyq» ordenimen marapattaldy
ASTANA. KAZINFORM — Prezıdent Qasym-Jomart Toqaevtyń Jarlyǵymen eldegi joǵary bilim berý salasyn damytýǵa qosqan eleýli úlesi úshin Beıjiń til jáne mádenıet ýnıversıtetiniń prezıdenti Dýan Pen ІІ dárejeli «Dostyq» ordenimen marapattaldy.
Buǵan deıin Memleket basshysy «Qazaqstan – akademııalyq bilim aımaǵy» strategııalyq seriktester forýmynyń aıasynda Dýan Pendi qabyldaǵan. Prezıdent ýnıversıtettiń Astanadaǵy fılıalynyń ashylýy Qazaqstan-Qytaı yntymaqtastyǵynyń joǵary tıimdiligin aıqyn kórsetetin jarqyn mysalǵa aınalǵanyn atap ótip, onyń gýmanıtarlyq baılanystardy nyǵaıtýǵa jáne eki el arasyndaǵy zııatkerlik kópir qalyptastyrýǵa yqpal etip otyrǵanyn aıtty.
Qazirgi ýaqytta Qazaqstanda jetekshi sheteldik ýnıversıtetterdiń fılıaldary men strategııalyq seriktestikterinen quralǵan jeli qalyptasyp keledi. Olardyń bilim berý baǵdarlamalarynyń 85 paıyzy jasandy ıntellekt, kompıýterlik ınjenerııa, kıberqaýipsizdik, jaratylystaný jáne tehnıkalyq ǵylymdar, ıadrolyq fızıka jáne ózge de suranysqa ıe joǵary tehnologııalyq baǵyttarǵa baǵdarlanǵan. Osy turǵyda jasandy ıntellekt tehnologııalaryn damytý, ǵylymı-bilim berý salasyndaǵy ózara is-qımyldy keńeıtý, sondaı-aq bilikti qytaıtanýshy-lıngvısterdi daıarlaý erekshe mańyzǵa ıe.
Astana halyqaralyq ýnıversıteti bazasynda Ortalyq Azııadaǵy qytaı tildik bilim berýdiń alǵashqy ortalyǵy – Beıjiń til jáne mádenıet ýnıversıtetiniń (BLCU) fılıalyn ashý Qazaqstan-Qytaı bilim berý yntymaqtastyǵyn damytýdaǵy mańyzdy kezeńge aınalyp, fılıal qyzmetiniń tabysty júzege asyrylyp jatqanyn aıqyn dáleldedi.
Aıta ketelik Qazaqstan men Japonııa ǵylym, bilim salasynda birqatar kelisim jasaǵan edi.