Beıjiń sheteldik týrısterge arnalǵan GO BEIJING platformasyn iske qosty
ASTANA. KAZINFORM — Beıjiń sheteldik qonaqtarǵa arnalǵan biryńǵaı tsıfrlyq GO BEIJING platformasyn iske qosty. Joba týrıster úshin saparlardy jáne kúndelikti qyzmetterdi jeńildetýge baǵyttalǵan, dep habarlaıdy Sınhýa.
Platformany qalalyq vedomstvolar men Alipay tólem servısi ázirlengen. Sondaı-aq jobaǵa týrızm, saýda jáne salyq salasy qurylymdary tartylǵan.
Alipay qosymshasynda paıdalanýshylarǵa 16 tilde 39 qyzmet qoljetimdi. Olardyń qatarynda bılet pen qonaqúı brondaý, saparlardy josparlaý qyzmetteri bar. Sonymen qatar, jasandy ıntellekt gıdin qosa alǵanda, tsıfrlyq quraldar engizilgen.
Budan bólek, «sapar ámııany» fýnktsııasy jumys isteıdi. Ol transshekaralyq aýdarymdar arqyly shotty tolyqtyryp, Qytaı aýmaǵynda tólem jasaýǵa múmkindik beredi. Bul servıs 40 eldiń azamattary úshin qoljetimdi.
Aıta keteıik, Beıjiń sheteldikter úshin jaǵdaıdy jaqsartýdy jalǵastyryp keledi. Máselen, Shoýdý men Dasın halyqaralyq áýejaıy aýmaqtarynda qarjylyq jáne kólik servısi men 20-dan astam bazalyq jaǵdaı jasaıtyn biryńǵaı qyzmet kórsetý pýnktteri jumys isteıdi.
Qytaı astanasyna qyzyǵýshylyqtyń artýy vızasyz rejımniń keńeıýimen de baılanysty. Jyl basynan beri Beıjińniń shekaralyq beketteri arqyly 7 mıllıonnan astam adam ótken. Bul ótken jylmen salystyrǵanda 13,3 paıyzǵa kóp. Qazirgi ýaqytta Qytaı 50 el úshin birjaqty vızasyz rejım engizip, 240 saǵattyq tranzıtpen kirýge ruqsat etilgen elder tizimin 55-ke deıin keńeıtti.
Eske salaıyq, Qytaı mamyr aıyndaǵy merekeler aldynda áýe reısterin jappaı toqtatty.
