Beıjiń nóser jańbyrǵa baılanysty eń joǵary dabyl deńgeıin jarııalady

ASTANA. KAZINFORM – Qytaı astanasynda dúısenbi kúni nóser jańbyrǵa baılanysty eskertýdiń eń joǵary deńgeıi jarııalandy, dep habarlaıdy Kazinform tilshisi Sınhýa agenttigine silteme jasap. 

Beıjiń meteorologııalyq qyzmeti saǵat 13.00-de qyzyl dabyl deńgeıin jarııalady. Bul – Qytaıdyń tórt deńgeıli eskertý júıesindegi eń joǵary kórsetkish. 

Sınoptıkterdiń boljaýynsha, nóser jaýyn kelesi tańǵa deıin jalǵasady. Elordalyq aýdandardyń kópshiliginde 6 saǵatta jaýatyn jaýyn-shashyn mólsheri 100 mm, keı jerlerde tipti 200 mm-den asady dep kútilip otyr. 

Beıjiń sý resýrstary basqarmasy men meteorologııalyq qyzmet eń osal aımaqtarda: Mııýn, Fangshan, Mentýgoý jáne Hýaırýda taý aǵyndarynyń qaýpi týraly eskertý jasady. 

Qazirgi ýaqytta sel, kóshkin jáne basqa da tabıǵı qaýipterdiń joǵary yqtımaldyǵy saqtalatyn Shıtszınshan, Fentaı, Hýaıroý, Fanshan jáne Mentýgoý aýdandarynda qyzyl eskertý deńgeıi kúshine endi. 

Buǵan deıin habarlaǵanymyzdaı, Qytaıdyń ońtústigindegi taýly aımaqta sý tasqynynan 5 adam qaza tapty.