Beıjiń men Tıantszın sý tasqynyna baılanysty tótenshe jaǵdaı rejımin engizdi

BEIJІŃ. KAZINFORM — QHR Sý resýrstary mınıstrligi ortalyq baǵynysty Beıjiń jáne Tıantszın qalalarynda 4-inshi deńgeıdegi sý tasqynyna qarsy tótenshe jaǵdaı rejımin engizdi. Bul týraly Xinhua jazdy

Vedomstvonyń málimetinshe, boljanǵan nóser jaýyn men yqtımal sý tasqynyna baılanysty Qytaıdyń soltústiginde ornalasqan Beıjiń-Tıantszın-Hebeı aımaǵynda tótenshe jaǵdaı rejımi engizilgen.

26-28 tamyz aralyǵynda Qytaıdyń atalǵan aımaqtarynda nóser jaýyn jaýady dep boljanǵan, bul birqatar shaǵyn jáne orta ózenderde qaýiptilik deńgeıinen asý qaýpin arttyryp otyr. 

Beıjińde 60 myńǵa jýyq jergilikti turǵyn evakýatsııalanyp, Qytaı astanasynyń taýly aımaqtaryndaǵy týrıstik oryndar jabyldy. 3 myńnan astam nysanda qurylys jumystary toqtatyldy. Beıjińde tsıklonnyń yqtımal zardaptaryn joıý úshin 200 myńǵa jýyq mýnıtsıpaldyq qyzmetker jumyldyryldy.

Eske sala ketsek, Qytaı astanasy Beıjińde 26 shildeden bastap nóser jaýyn quıdy, arty sý tasqynyna ulasty. 28 shildede qyzyl dabyl jarııalanyp, turǵyndarǵa qajetsiz syrtqa shyqpaý, al kásiporyndarǵa qyzmetkerlerdi jumysqa shaqyrmaý týraly eskertý jasaldy. 29 shildedegi sońǵy málimetterge súıensek, Beıjińdegi sý tasqyny 30 adamnyń ómirin qıǵan.

Nóser jaýynǵa baılanysty Beıjińde 82 myńnan astam adam evakýatsııalandy.

Buǵan deıin Qytaıdyń soltústigindegi iri portty megapolıs — Tıantszın qalasynda 31 tamyz ben 1 qyrkúıek aralyǵynda ótetin Shanhaı yntymaqtastyq uıymynyń tarıhtaǵy eń aýqymdy sammıtine daıyndyq jumystary aıaqtalýǵa jaqyn ekenin jazǵan bolatynbyz.