Beıjiń QHR men AQSh kásiporyndarynyń arasynda iskerlik yntymaqtastyqty qoldaýǵa daıyn

ASTANA. KAZINFORM – Beıjiń qytaılyq jáne amerıkalyq kompanııalar arasynda qalypty iskerlik yntymaqtastyqty qoldaýǵa daıyn, dep málimdedi Qytaıdyń kommertsııa mınıstrligi.

Bul týraly mınıstrlik ókilderi buqaralyq aqparat quraldarynda jarııalanǵan Qytaı «Boeing» ushaqtaryn qabyldaýdy toqtatty degen habar aıasynda málimdedi, dep jazady Kazinform agenttiginiń tilshisi.

Qytaı men AQSh uzaq ýaqyt boıy azamattyq avıatsııa salasynda ózara tıimdi yntymaqtastyqty qoldap keldi. Óz kezeginde bul ekijaqty saýda men gýmanıtarlyq almasýlardy júzege asyrýǵa oń yqpal etti, dep keltiredi QHR-diń kommertsııa mınıstrliginiń málimdemesin Sınhýa.

Alaıda «tarıf shoqparyn» ońdy-soldy siltep júrgen Qurama Shtattardyń áreketi jahandyq óndiris jáne jetkizý tizbeginiń turaqtylyǵyna nuqsan keltirip, halyqaralyq áýe tasymaly naryǵynyń jumysyn buzdy, dep kórsetti vedomstvo ókilderi.

-Kóptegen kásiporyndarda qalypty saýda jáne ınvestıtsııalyq qyzmetti júzege asyrý múmkindigi joq, Qytaıdyń áýe kompanııalarymen qosa Boıng kompanııasyna da zııan keldi, dep habarlady vedomstvo ókilderi.

QHR kommertsııa mınıstrliginiń ókilderi Qytaı Qurama Shtattar kásiporyndardyń pikirine qulaq asyp, olardyń turaqty, qalypty saýda jáne ınvestıtsııalyq qyzmetine qajetti orta qalyptastyrady degen úmitte ekenin jetkizdi.

Osyǵan deıin Qytaı Panama kanalyndaǵy porttardyń satylýyna tekserý júrgizýdi talap etip otyrǵany týraly jazdyq.