Beıjiń halqynyń úshten biri 2035 jylǵa qaraı qart adamdar bolady
ASTANA. KAZINFORM — 2035 jylǵa qaraı Beıjiń turǵyndarynyń 33 paıyzdan astamy 60 jastan asqan azamattar bolady. Osylaısha Qytaı astanasy halqy qartaıǵan qalalar sanatyna enedi, dep habarlaıdy Kazinform agenttiginiń menshikti tilshisi Beijing Daily basylymyna silteme jasap.
Bılik málimetine sáıkes, 2025 jyldyń sońynda Beıjińde turaqty turatyn 60 jastan asqan turǵyndar sany 5,288 mıllıonǵa jetip, qala halqynyń 24,3 paıyzyn quraǵan.
Demografııalyq ózgeristerge baılanysty Beıjiń bıligi áleýmettik jáne medıtsınalyq ınfraqurylymdy jańǵyrtýdy jedeldetip jatyr. Jyl basynda qarttarǵa kútim kórsetý týraly ereje kúshine enip, áleýmettik qyzmet kórsetýdiń úsh deńgeıli júıesin qalyptastyrý bekitildi.
Qazirgi tańda Beıjińde qarttarǵa kútim kórsetetin 620 mekeme, 168 aýdandyq ortalyq jáne 1500-den astam jergilikti qyzmet kórsetý orny jumys isteıdi. Olardyń jalpy syıymdylyǵy 155 myń adamdy qamtıdy.
Qarttarǵa qyzmet kórsetýdi qoljetimdi etý úshin Beıjińde kómek kórsetý jáne tamaqtandyrýǵa arnalǵan 3 myńǵa jýyq arnaıy ortalyq ashylǵan. Olar qala men aýyldyq eldi mekenderdiń 90 paıyzynda jumys isteıdi. Aldaǵy úsh jylda bılik úıde kásibı kútim kórsetýge arnalǵan 30 myń oryndy jabdyqtaýdy josparlap otyr.
2026-2030 jyldarǵa arnalǵan 15-besjyldyq jospary aıasynda qarttarǵa arnalǵan 60 myń orynǵa sýbsıdııa bólý, meıirgerlik kútim kórsetiletin oryndardyń úlesin 73 paıyzǵa deıin arttyrý jáne dementsııaǵa shaldyqqan naýqastarǵa arnalǵan arnaıy bólimder ashý kózdelgen. 2030 jylǵa qaraı ekinshi jáne odan joǵary deńgeıdegi qalalyq aýrýhanalardyń 95 paıyzdan astamynda gerıatrııa bólimderi jumys isteýge tıis.
Buǵan deıin Qytaıda 60 jastan asqan turǵyndar sany 323 mıllıonnan asqany habarlanǵan bolatyn.
