Beıjiń forýmynda JI-konsaltıng jáne Ortalyq Azııamen áriptestik talqylandy
ASTANA. KAZINFORM – Qytaı astanasynda ótken halyqaralyq forýmda jasandy ıntellekt (JI) negizindegi konsaltıng jáne Ortalyq Azııa elderimen yntymaqtastyqty damytý máseleleri qaraldy, dep habarlaıdy Kazinform.
«Dıplomattar men bıznes kóshbasshylary arasyndaǵy dıalog» forýmyna 60-tan astam eldiń ókilderi qatysty. Kezdesýdiń basty maqsaty – naqty jobalar arqyly ekonomıkalyq áriptestikti kúsheıtý boldy.
Qytaı halyqaralyq saýda jáne ekonomıkalyq yntymaqtastyq akademııasynyń ókili Lıý Hýatsın Qazaqstannyń 2029 jylǵa deıin JІÓ-ni eki eseleý josparyna toqtalyp, bul óńirlik yntymaqtastyqqa jańa serpin beretinin aıtty.
Forým barysynda ınvestorlarǵa arnalǵan jasandy ıntellekt negizindegi arnaıy platformalar tanystyryldy. Bul júıeler Ortalyq Azııa naryqtaryn taldaýǵa, táýekelderdi baǵalaýǵa jáne bıznes júrgizýdi jeńildetýge múmkindik beredi.
– Mundaı júıe birneshe mınýt ishinde tereń taldaý jasap, kompanııalardyń shyǵynyn aıtarlyqtaı azaıtady. Quny dástúrli konsaltıng qyzmetterinen áldeqaıda tómen, – dedi kompanııa ókili.
JI júıesiniń derekter dáldigi shamamen 90%-ǵa jetedi. Sonymen qatar ol zańdy tulǵalardy tirkeý men salyqtyq josparlaýdy avtomattandyrýǵa kómektesedi.
Forýmǵa qatysqan qazaqstandyq kásipkerler elektrondy saýdaǵa arnalǵan erkin aımaqtardy damytý qajettigin atap ótti. Olardyń aıtýynsha, Qytaıdaǵy jeńildetilgen kedendik rejım Qazaqstan úshin tıimdi tájirıbe bola alady.
Aıta keteıik, Qytaı Meta-nyń Manus JI-startapyn satyp alý týraly kelisimin buǵattady.
