Beıjiń feık aqparat quraldarymen kúres naýqanyn bastady
ASTANA. KAZINFORM – Qytaı astanasynyń kıberkeńestik basqarmasy onlaın ortany tazalaýǵa baǵyttalǵan arnaıy aılyq naýqandy bastady.
Atalǵan bastama memlekettik lıtsenzııasyz nemese ózin resmı BAQ retinde jarııalap, aqparat taratyp júrgen akkaýnttar men platformalarmen kúreske baǵyttalǵan, dep habarlaıdy Kazinform agenttiginiń menshikti tilshisi.
«Astanany tazartaıyq: taza derekkóz jáne taza daýys» degen ataýǵa ıe bolǵan naýqan aqparattyq keńestikti tártipke keltirip, jetekshi aqparat quraldarynyń yqpalyn arttyrýǵa shaqyrady.
Atalǵan baǵdarlama aıasynda retteýshi basty tórt zańbuzýshylyqty nazarǵa alady:
1. Lıtsenzııasyz qyzmet etý
Jańalyqtardy jınaý, óńdeý jáne qaıta jarııalaýmen aınalysatyn, alaıda tıisti kásibı lıtsenzııasy joq platformalardyń jumysy toqtatylmaq. Ásirese, resmı ruqsaty joq uıymdardyń jýrnalıstik suhbattar júrgizý derekterine erekshe nazar aýdarylady. Mundaı áreketter zań talaptaryn tikeleı buzý retinde qarastyrylady.
2. Memlekettik bedeldi basylymdardyń atyn jamylǵan aqparat kózderi
Ataýlarynda «jańalyqtar», «reportaj» sekildi sózderdi paıdalanyp, nemese bedeldi memlekettik basylymdardyń syrtqy beınesine uqsas vızýaldy belgilerdi qoldanatyn akkaýnttarǵa qarsy sharalar kúsheıtiledi. Bul — aýdıtorııany ádeıi jańylystyrýǵa baǵyttalǵan áreket dep baǵalanady.
3. Jalǵan aqparat taratý
Klıkbeıt taqyryptarmen jarııalanǵan materıaldardy joıý, derekterdi burmalaý jaǵdaılarynyń jolyn kesý jáne «aqparattyq bopsalaý» tájirıbesine qarsy kúres júrgiziledi. Áńgime kásiporyndar týraly ádeıi jaǵymsyz málimet taratyp, keıin sol kontentti óshirý úshin paıda tabýǵa umtylatyn áreketter jóninde bolyp otyr.
4. Akkaýnttardyń baqylaýdan tys qalýy
Hakerler zańǵa qaıshy aqparat nemese kommertsııalyq maqsattaǵy jarnamalarda taratý úshin paıdalanýy múmkin resmı jańalyqtar uıymdarynyń qaraýsyz qalǵan jazbalaryna endi mnıtorıng júrgiziledi.
Negizgi tetikterdiń biri «Jarııa lıtsenzııa» atty tsıfrlyq tańbalaý júıesi bolady. Jańalyq taratýǵa resmı ruqsaty bar barlyq ashyq akkaýnttar qyzyl tústi «V» belgisimen belgilenedi. Bul tańba paıdalanýshylarǵa qyzmet kórsetýshiniń resmı ataýyn, lıtsenzııa nómirin jáne ruqsat etilgen qyzmet túrlerin birden tanýǵa múmkindik beredi.
Osyǵan deıin Qytaıdyń Ulttyq sýperkompıýter jelisine negizdelgen avtonomdy jasandy ıntellekt júıesin iske qosqany týraly jazdyq.
