Beıjiń BUU Bas hatshysyn saılaý jónindegi ustanymyn jarııalady
ASTANA. KAZINFORM — Qytaı BUU-nyń kelesi Bas hatshysyn saılaý protsesine belsendi qatysyp, álemdik uıymnyń rólin nyǵaıtýǵa baǵyttalǵan kúsh-jigerdi qoldaıtynyn málimdedi, dep habarlaıdy Sınhýa.
Bul týraly Qytaı syrtqy ister mınıstri Van I Chılıdiń burynǵy prezıdenti Mıshel Bacheletmen kezdesýde málimdedi. Ol Bacheletti BUU Bas hatshysy qyzmetine úmitkerlerdiń biri retinde qarastyryp otyr.
Van I Beıjiń jańa Bas hatshyny tańdaýda jaýapty jáne syndarly ustanym saqtaıtynyn atap ótti. Qytaı BUU-nyń tıimdiligin arttyryp, onyń bedeli men jahandyq máselelerdi sheshý qabiletin kúsheıtýge úles qosýdy kózdeıdi.
Qytaı dıplomatııasynyń basshysy uıym ózgerip jatqan álemdik jaǵdaıǵa beıimdelip, jahandyq problemalardy sheshýde negizgi rólin saqtaýy tıis ekenin aıtty.
Óz kezeginde Mıshel Bachelet BUU memleketter arasyndaǵy yntymaqtastyq úshin mańyzdy alań bolyp qala beretinin jetkizdi. Onyń pikirinshe, uıym BUU Jarǵysyna súıenip, beıbitshilikti saqtaý, damý jáne adam quqyqtaryn qorǵaý baǵyttaryna basymdyq berýi kerek.
Sondaı-aq ol Qytaı saıasatyn qoldaıtynyn aıtyp, Beıjińniń kópjaqty yntymaqtastyqty damytýǵa qosqan úlesin joǵary baǵalady jáne BUU-nyń yqpalyn kúsheıtý úshin basqa eldermen birge jumys isteýge daıyn ekenin bildirdi.
Aıta keteıik, BUU byltyr qarasha aıynda jańa Bas hatshyny saılaý protsesin bastaǵan bolatyn. Uıymnyń qazirgi Bas hatshysy Antonıý Gýterrıshtiń mandaty 2026 jyldyń 31 jeltoqsanynda aıaqtalady.
