Beıjiń birjaqty sanktsııalarǵa qarsy: QHR Tramptyń málimdemesine pikir bildirdi

ASTANA. KAZINFORM — Qytaı energetıkalyq qaýipsizdik salasyndaǵy saıasatyn óz ulttyq múddelerine súıene otyryp, derbes aıqyndaıdy, dep habarlaıdy IRNA agenttigi.

Bul týraly Qytaı Halyq Respýblıkasynyń Syrtqy ister mınıstrliginiń resmı ókili Go Tszıakýn málimdedi.

— Qytaı árqashan energetıkalyq qaýipsizdik salasyndaǵy saıasatynda óz múddelerin basshylyqqa alady. Biz birjaqty sanktsııalar men syrtqy qysymǵa úzildi-kesildi qarsymyz, — dedi dıplomat.

Bul málimdeme Vashıngtonnyń Iranǵa qarsy sanktsııalardy, sonyń ishinde energetıka salasyndaǵy shekteýlerdi halyqaralyq áriptesterinen saqtaýdy talap etip jatqan qysymy aıasynda jasaldy.

Buǵan deıin Donald Tramp Izraıl men Iran atysty toqtatý týraly kelisimge kelgennen keıin Qytaı Iran munaıyn satyp alýdy jalǵastyrýy múmkin ekenin aıtqan bolatyn. Alaıda keıinirek Aq úı Tramptyń bul pikirleri AQSh sanktsııalarynyń jeńildeıtinin bildirmeıtinin túsindirdi.

Sonymen qosa Qytaı AQSh-pen saýda kelisimi jasalǵanyn rastady. Jarııalanǵan málimdemede QHR baqylaýdaǵy taýarlardyń eskportyna ruqsat etilgenin rastaıdy, al AQSh Qytaıǵa qarsy qolǵa alynǵan shekteý sharalaryn alyp tastaıdy.