Beıjiń bastaýysh mektebiniń oqýshylary Qazaqstan mádenıet ortalyǵyna bardy — sheteldegi qazaq baspasózi

Buharada halyqaralyq kókpar týrnıri ótedi — ÓzA

Buhara óńiri taǵy bir márte dúbirli dodaǵa kýá bolmaq. Buhara oblysynyń Buhara aýdanynda ornalasqan Ulttyq gvardııanyń «Shabandozdar mektebi» alańynda 27–29 naýryz kúnderi halyqaralyq kókpar týrnıri ótedi, dep habarlaıdy «ÓzA» aqparat agenttigi.

Habarlamada aıtylǵandaı, dalanyń tósin dúbirge bóleıtin bul saıys Ózbekstan Sport mınıstrligi, Ulttyq gvardııa, eldiń kókpar federatsııasy jáne seriktes uıymdardyń qoldaýymen besinshi ret uıymdastyrylyp otyr. Bıylǵy básekege Reseı, Qazaqstan, Qyrǵyzstan, Tájikstan, Qytaı elderinen kelgen saıdyń tasyndaı iriktelgen komandalar, sondaı-aq Ózbekstan namysyn qorǵaıtyn eki komanda qatysady.

At tuıaǵynyń dúbiri men shabandozdardyń serkeni ilip áketken sáttegi qaısarlyq pen qaıtpas rýhy — bári de osy alańda toǵysady.

Aıta ketý kerek, bul halyqaralyq týrnır sońǵy jyldary dástúrli sıpat alyp keledi. Ol 2022 jáne 2023 jyldary Surhandarııa oblysynda, 2024 jyly Ferǵana óńirinde, 2025 jyly Namangan oblysynda joǵary deńgeıde uıymdastyrylyp, jankúıerlerdiń zor yqylasyna bólengen bolatyn.

Sondaı-aq «ÓzA»-da «Tashkentte avtobýstarǵa arnalǵan arnaıy jolaqtardy erekshe tásilmen belgilemek» degen mazmundaǵy aqparat jarııalandy.

Keltirilgen derekterge súıensek, Tashkent qalasynda qoǵamdyq kólik qozǵalysyn tıimdi uıymdastyrý maqsatynda avtobýstarǵa arnalǵan arnaıy jolaqtardy erekshe tásilmen belgileý josparlanyp otyr.

Bul týraly Jol qozǵalysyn uıymdastyrý ortalyǵy habarlaǵan.

Málimetke sáıkes, qaladaǵy qoǵamdyq kólikke arnalǵan «A» tańbaly jolaqtar arnaıy delınıatorlar, ıaǵnı jol boıyna ornatylatyn qorshaýlar arqyly bólinedi. Mundaı tásil avtobýstarǵa arnalǵan jolaqtardy aıqyn kórsetip qana qoımaı, basqa kólik quraldarynyń bul jolaqtarǵa kirýiniń aldyn alýǵa múmkindik beredi.

Mamandardyń aıtýynsha, bul bastama qoǵamdyq kóliktiń qozǵalysyn jyldamdatyp, avtobýstardyń ýaqyt kestesin saqtaýǵa jáne qala joldaryndaǵy kólik aǵynyn tıimdi retteýge oń áserin tıgizedi.

Beıjiń bastaýysh mektebiniń oqýshylary Qazaqstan mádenıet ortalyǵyna bardy — Halyq gazeti

21 naýryz kúni Beıjiń qalasynan bastaýysh mekteptiń 40-tan astam oqýshysy Beıjińdegi Qazaqstan mádenıet ortalyǵyna baryp, Qytaıdaǵy Qazaqstan elshilerimen jáne ortalyq dırektorymen birge Qazaqstannyń salt-dástúrlerimen tanysty, dep habarlady Halyq gazeti. 

Atalǵan BAQ-tyń dereginshe, is-shara barysynda Qazaqstannyń Qytaıdaǵy elshiliginiń mádenıet keńesshisi qytaı-qazaq mádenı almasýlarynyń jetistikterin tanystyrdy. Oqýshylar dástúrli kıimderdi, qolóner buıymdaryn jáne tarıhı qujattardyń kóshirmelerin kórdi.

Sonymen qatar qysqametrajdy fılmderdi tamashalaý, dástúrli taǵamdardyń dámin tatý, ulttyq kıimderdi kıip kórý jáne bı úırený arqyly olar ózge mádenıettiń tartymdylyǵyn sezindi.

— Qytaılyq oqýshylardyń ókilderi án aıtyp, bı bılep, ulttyq aspaptarda oınap, Qytaıdyń úzdik dástúrli mádenıetin kórsetti, dep jazady qytaılyq BAQ.

Sondaı-aq osy aptada Halyq gazeti basylymynda «Qytaılyq teleshoý Qazaqstan topyraǵynda» degen aqparat jaryq kórdi. 

Qytaılyq BAQ-tyń málimetinshe, án áýenimen birge saıahat jasańyz. Jaqynda Qazaqstanda túsirilgen «Kókjıek úni» atty estradalyq teleshoý taralyp jatyr. Alty elden kelgen segiz ánshi 7436 shaqyrymdyq mádenı sapar jolyn bastady. Olardyń sapary Qazaqstannyń Almaty, Túrkistan, Astana, Aqtaý sııaqty tórt qalasyn baılanystyrady. Ánshiler jergilikti jerge baryp, bazarlardy, dalany, turǵyn úılerdi aralap, jergilikti ónerpazdarmen betpe-bet kezdesip, tipti ekspromttyq yntymaqtastyqta óner kórsetti. Sodan keıin óz saparlarynan alǵan shynaıy áserlerin sahnadaǵy týyndylarǵa aınaldyrdy.

— «Kókjıek úni» teleshoýyn QHR Memlekettik radıo jáne televızııa basqarmasynyń halyqaralyq yntymaqtastyq departamentiniń basshylyǵymen, Hýnan radıo jáne televızııa stantsııasy men Qazaqstan birlesip daıyndaǵan. Bul shoý tek Qytaı teleshoý óndirýshileriniń ınnovatsııalyq talpynysy ǵana emes, sonymen qatar mádenıet arqyly halyq arasyndaǵy rýhanı jaqyndyqty ornatýdyń jarqyn tájirıbesi, — dep jazady Halyq gazeti.

Sonymen qatar osy aptanyń sońynda Halyq gazeti basylymynda «Astana LRT-syn basqarý mamandarynyń tórtinshi tóby Tıantszınde oqýyn aıaqtady» degen aqparat jarııalandy.

Qytaılyq basylymnyń deregine súıensek, 26 naýryzda Tıantszın temirjol tranzıttik toby Astana jeńil temirjolynyń tórtinshi top basqarý mamandary men tyńdaýshylarynyń oqý bitirý saltanatyn ótkizdi. 20 mamannyń eki aıǵa sozylǵan tájirıbelik oqýy sátti aıaqtalǵan. Sóıtip, tórtinshi top mamandarynyń kýrsty tabysty bitirýimen Astana jeńil temirjolynyń birinshi kezeń qurylysy boıynsha mamandar men tyńdaýshylardy Tıantszınde daıarlaý mindeti de tolyq aıaqtalǵan.

Tórtinshi top basqarý mamandarynyń ujym jetekshisi Erik Dosmuhamedulynyń aıtýynsha, mamandar jumysqa kirisýge daıyn eken. Aldaǵy ýaqytta alǵan bilimderin Astana LRT jumysyn júrgizýde qoldanyp, qala turǵyndaryna sapaly qyzmet kórsetpek.

Qytaılyq BAQ-tyń málimetinshe, osy ýaqytqa deıin Tıantszın temirjol tranzıttik toby el ishinde jáne shetelde 10 toptyq oqý ótkizip, jıyntyǵy 300-den astam Astana LRT mamandaryna júıeli, kásibı daıarlyq qyzmetin usynǵan. Mamandar Astana LRT-syn paıdalanýǵa daıyndyq jumystaryna kezeń-kezeńmen aralasýda.

Álemde munaı baǵasy taǵy qymbattady — ParsToday

Soltústik teńizdiń Brent munaıynyń bir barreliniń baǵasy apta sońyna qaraı, atap aıtqanda juma kúni 110 dollardan asty jáne álemdik naryqtarda ósý úrdisin jalǵastyrdy, dep jazdy ParsToday aqparat agenttigi.

Irandyq basylymnyń habarlaýynsha, AQSh úkimetiniń naryqty tynyshtandyrý úshin Iranmen konstrýktıvti kelissózder júrgizgenin aıtyp, Irannyń energetıkalyq nysandaryna shabýyldan bas tartyp, ýaqytyn qaıta uzartqanyna qaramastan munaı baǵasy qymbattady.

Degenmen, munaı naryǵy Tramp pen onyń úkimetiniń málimdemelerine oń reaktsııa kórsetpedi.

AQSh pen Izraıldiń Iranǵa qarsy soǵysy álemniń shamamen bir besinshi bóligi suıyltylǵan tabıǵı gaz jáne munaıynyń Ormýz buǵazynan ótýin toqtatty. Sondyqtan Halyqaralyq energetıka agenttigi bul daǵdarysty munaı jetkizýdegi eń úlken úzilis dep atady.

Anadolydan tabylǵan arheologııalyq jasyryn qazynalary — TRT

Tarıh boıy sansyz órkenıetke qushaǵyn ashqan Anadoly ótkenniń izin saqtaǵan jádigerlerge toly. Búginge deıin kóptegen mańyzdy qaldyq jer betine shyǵarylǵanymen, topyraqtyń tereńinde áli de ashylýyn kútip jatqan talaı mádenı mura bar, dep habarlaıdy Túrkııa Radıo Televızııa portaly.

Atalǵan BAQ-tyń dereginshe, Mádenıet jáne týrızm mınıstrliginiń úılestirýimen júrgizilip jatqan arheologııalyq qazbalar Anadolynyń myńdaǵan jyldyq tarıhyn jaryqqa shyǵaratyn jańa oljalardyń tabylýyna jol ashyp otyr. Túrkııanyń tórt buryshynda, qurlyqta da, sý astynda da jumys isteıtin maman toptar ınemen qudyq qazǵandaı eńbek etýde. Olar sabyrmen ótkenniń izderin birtindep qalpyna keltirýge tyrysyp jatyr.

«TRT»-nyń keltirgen málimetine súıensek, 2025 jyly da Túrkııadaǵy arheologııalyq jumystar «Bolashaqqa mura» jobasy aıasynda úzdiksiz jalǵasqan. Ártúrli qalada júrgizilgen qazba barysynda sansyz jádiger jer betine shyǵarylypty.

Osy jyldyń eń nazar aýdararlyq arheologııalyq jańalyqtaryn jeke-jeke tanystyrǵan.

Atap aıtar bolsaq, Bartynnyń Amasra aýdany. Ol jerden Tabıǵı apattardan qıraǵany anyqtalǵan, Rım dáýirine tıesili bıiktigi 9 metrge deıin jetetin mármár baǵandarymen erekshelenetin stoa qurylysy tabylǵan.

Kelesi biri — Shanlyýrfada «Tas tóbeler jobasy» aıasynda júrgizilgen qazbalar barysynda tarıhtyń tereńine boılaıtyn biregeı olja tabyldy.

Bundaǵy týyndylar shamamen 10 myń 500 jyl burynǵy kezeńde jasalǵan.

Sondaı-aq sý túbinen de tarıhı qazynalar anyqtalǵan. Atap aıtqanda, Antalııanyń Kýmlýdja aýdanyndaǵy Adrasan jaǵalaýynda júrgizilgen sýasty arheologııalyq zertteýler barysynda Keıingi ellınızmge (Erte rım dáýirine) jatatyn keramıka tıegen keme qaldyǵy tabylǵan.

Sondaı-aq osy aptada «TRT»-da «AQSh Taıaý Shyǵysqa 10 000 ásker jiberýi múmkin» degen taqyryptaǵy aqparat jarııalandy.

Túrkııa Radıo Televızııa portalynda jarııalanǵan málimetterge sáıkes, Pentagon AQSh prezıdenti Donald Tramp Tegeranmen yqtımal beıbit kelissózderdi talqylap jatqan kezde, áskerı operatsııalardy kúsheıtý maqsatynda Taıaý Shyǵysqa 10 myń ásker jiberý múmkindigin qarastyrýda.

Túrkııalyq BAQ-tyń «The Wall Street Journal» basylymyna silteme jasap habarlaýynsha, Qorǵanys mınıstrligi ókilderi bul jospar jaıaý ásker men brondy tehnıkalardy qamtıtynyn málimdegen.

Qosymsha kúshter aımaqqa burynnan jiberilgen shamamen 5 myń teńiz jaıaý áskeri men 82-shi áýe-desanttyq dıvızııanyń myńdaǵan parashıýtshilerine qosylady.

Sondaı-aq, áskerlerdiń naqty qaı jerge ornalastyrylatyny ázirge belgisiz. Alaıda sheneýnikter olardyń Iran aýmaǵyna jáne el jaǵalaýyndaǵy mańyzdy munaı eksport ortalyǵy sanalatyn Harg aralyna jaqyn jerge ornalasýy múmkin ekenin atap ótti.

Budan buryn MAGATE Irandaǵy AES mańyndaǵy soqqylar ıadrolyq qaýip tóndirýi múmkin ekenin aıtty.